མི་དམངས་དྲ་བའི་འཕྲིན། སྤྱི་ཟླ་3ཚེས་16ཉིན་ཙུང་ལི་ལི་ཁེ་ཆང་གིས་རྒྱལ་སྲིད་སྤྱི་ཁྱབ་ཁང་གི་ཚབ་ཞུས་ནས་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པའི་ཐོག་གནང་བའི་<<སྲིད་གཞུང་གི་ལས་དོན་སྙན་སྒྲོན་>>ཆ་ཚང་ཡོངས་བསྒྲགས་བྱས་པ་རེད། ཟླ་3ཚེས་15ཉིན་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པའི་ཐོག་སྲིད་གཞུང་གི་ལས་དོན་སྙན་སྒྲོན་སྐོར་གྱི་གྲོས་ཆོད་ལ་བརྡས་ཐག་བཅད་ནས་གྲོས་འཆམ་བྱུང་སྟེ་སྙན་སྒྲོན་དེར་ཆོག་མཆན་སྤྲད་པ་རེད།
སྙན་སྒྲོན་དེ་ཁག་དྲུག་ལ་དབྱེ་ཡོད་པ་སྟེ། དང་པོ། 2014ལོའི་ལས་དོན་གྱི་ཕྱིར་དྲན་སྐོར་དང་། གཉིས་པ། 2015ལོའི་ལས་དོན་གྱི་སྤྱིའི་བཀོད་སྒྲིག་སྐོར། གསུམ་པ། སྒྱུར་བཅོས་སྒོ་དབྱེ་ཏན་ཏིག་ངང་གཏིང་ཟབ་ཕྱོགས་སུ་སྤེལ་རྒྱུའི་སྐོར། བཞི་པ། དཔལ་འབྱོར་བརྟན་པོའི་ངང་འཕར་རྒྱུ་དང་གྲུབ་ཆ་ལེགས་སྒྲིག་ལ་མཐུན་སྦྱོར་སྐུལ་འདེད་གཏོང་རྒྱུའི་སྐོར། ལྔ་པ། དམངས་འཚོ་ལེགས་གཏོང་དང་སྤྱི་ཚོགས་འཛུགས་སྐྱོང་ལ་རྒྱུན་མཐུད་སྐུལ་འདེད་གཏོང་རྒྱུའི་སྐོར། དྲུག་པ། སྲིད་གཞུང་གི་རང་ངོས་འཛུགས་སྐྱོང་ལ་ཤུགས་སྣོན་ཏན་ཏིག་རྒྱག་རྒྱུའི་སྐོར་བཅས་རེད།
སྙན་སྒྲོན་ནང་བསྟན་དོན། 2015ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྔོན་ཚུད་དམིགས་ཚད་གཙོ་བོ་ནི། རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་7%ཡས་མས་འཕར་བ་དང་། ཡུལ་མིའི་འཛད་སྤྱོད་རིན་གོང་འཕར་ཚད་3%ཙམ་ཟིན་པ། གྲོང་ཁྱེར་དང་གྲོང་རྡལ་གྱི་མི་ཁྲི་1000ཡན་གསར་དུ་ལས་ཞུགས་ཐུབ་པ། གྲོང་ཁྱེར་དང་གྲོང་རྡལ་དུ་ལས་ཤོར་ཐོ་འགོད་བྱེད་ཚད་4.5%ནང་ཚུན་དུ་ཚོད་འཛིན། ཕྱིར་གཏོང་ནང་འདྲེན་6%ཙམ་འཕར་བ། རྒྱལ་སྤྱིའི་གཏོང་ཡོང་གཞི་རྩའི་ཆ་ནས་དོ་སྙོམས་ཡོང་བ། དཔལ་འབྱོར་འཕེལ་རྒྱས་དང་མཉམ་དུ་ཡུལ་མིའི་ཡོང་འབབ་འཕར་བ་བཅས་བྱ་རྒྱུ་དང་ནུས་རྒྱུ་ཟད་ཤུགས་3.1%ཡན་ཆག་པ་དང་སྦགས་བཙོག་དངོས་པོ་གཙོ་གྲས་ཕྱིར་འབུད་བྱེད་ཚད་མུ་མཐུད་ཉུང་དུ་གཏོང་རྒྱུ་བཅས་རེད།
