༄༅།།ཞིས་ཅིན་ཕིང་གིས་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོའི་མཇལ་ཞུ་དང་ལེན་གནང་བ།

མི་དམངས་དྲ་བའི་འཕྲིན། ཟླ་6ཚེས་10ཉིན་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ལྷན་གྱི་ཀྲུའུ་ཞི་བཅས་ཡིན་པའི་ཞིས་ཅིན་ཕིང་གིས་ཀྲུང་ནན་ཧའེ་རུ་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོའི་མཇལ་ཞུ་དང་ལེན་གནང་ཞིང་། ཞིས་ཅིན་ཕིང་གིས་ཁོང་ལ་སློབ་སྦྱོང་སྙིང་རུས་དང་སྒོམ་ཧུར་ཐག་བརྒྱབ་སྟེ་པཎ་ཆེན་རིན་པོ་ཆེ་སྐུ་ཕྲེང་བཅུ་པའི་བཞེད་དགོངས་རྒྱུན་འཛིན་དང་། ནང་པའི་ཆོས་ཀྱི་འགྲོ་བ་ཀུན་འདྲ་མཉམ་ཡིན་པ་དང་བྱམས་སྙིང་རྗེ་འཆང་བའི་འདུ་ཤེས་རྒྱུན་འཛིན་བྱས་ནས་བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བར་སྐུལ་སྤེལ་ཧུར་ཐག་བཏང་སྟེ་ནང་བསྟན་རིག་པ་བྱང་ཆུབ་པ་དང་སེར་སྐྱ་དད་ལྡན་པ་རྣམས་ཀྱིས་གུས་བཀུར་ཞུ་བའི་བོད་བརྒྱུད་ནང་བསྟན་གྱི་སྤྲུལ་སྐུ་ཞིག་གནང་རྒྱུའི་སྐུལ་ལྕག་གནང་བ་རེད།
         ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་དང་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཡུས་ཀྲེང་ཧྲེང་ཕེབས་རོགས་ཞུས་ཏེ་མཇལ་ཞུ་དང་ལེན་གནང་བ་རེད།
         པཎ་ཆེན་གྱིས་ཞིས་ཅིན་ཕིང་ལ་མཇལ་དར་ཕུལ་བ་དང་འབྲེལ་རང་ཉིད་ཁྲི་འདོན་མངའ་གསོལ་ནས་ལོ་20རིང་གི་གནས་ཚུལ་ངོ་སྤྲོད་གནང་བ་དང་། ཞིས་ཅིན་ཕིང་གིས་ཁོང་གང་ཅིའི་ཐད་ལ་ཡར་རྒྱས་ཆེན་པོ་ཕྱིན་པར་རྟེན་འབྲེལ་ཞུས་གནང་བ་རེད།
         ཞིས་ཅིན་ཕིང་གིས་ཏང་ཀྲུང་དབྱང་གིས་སྔ་ཕྱི་བར་གསུམ་དུ་བོད་ལྗོངས་ཀྱི་ལས་དོན་ལ་ཚད་མཐོའི་མཐོང་ཆེན་བྱེད་ཀྱི་ཡོད། ད་ལོ་ནི་བོད་རང་སྐྱོང་ལྗོངས་དབུ་བརྙེས་ནས་ལོ་ངོ་50འཁོར་བའི་ལོ་ཡིན་པས། ཏང་ཀྲུང་དབྱང་གིས་འཐུས་ཚབ་ཚོགས་པ་མངག་གཏོང་བྱས་ནས་བོད་ལྗོངས་སུ་བསྐྱོད་དེ་བོད་ལྗོངས་ཀྱི་མི་རིགས་ཁག་གི་མི་དམངས་དང་མཉམ་དུ་དུས་ཆེན་འདིར་རྟེན་འབྲེལ་ཞུ་རྒྱུ་ཡིན། ཏང་ཀྲུང་དབྱང་གི་ཐུགས་ཁུར་གནང་བ་དང་རྒྱལ་ཡོངས་མི་དམངས་ཀྱིས་རྒྱབ་སྐྱོར་ཤུགས་ཆེན་གནང་བའི་འོག་2020ལོར་སླེབས་སྐབས་བོད་ལྗོངས་ཀྱི་མི་རིགས་ཁག་གི་མི་དམངས་ནི་རྒྱལ་ཡོངས་མི་དམངས་དང་མཉམ་དུ་སྒོ་ཀུན་ནས་འབྱོར་འབྲིང་སྤྱི་ཚོགས་འཛུགས་སྐྲུན་བྱེད་རྒྱུའི་དམིགས་ཡུལ་མངོན་དུ་འགྱུར་བར་བྱས་ཏེ་བོད་ལྗོངས་ཀྱི་མི་རིགས་ཁག་གི་མི་དམངས་ཀྱི་འབྱུང་འགྱུར་ནི་སྔར་ལས་བཟང་ཞིང་ཕུན་སུམ་ཚོགས་པ་ཡིན་པར་ཡིད་ཆེས་ཡོད་ཅེས་གསུངས་པ་རེད།
         ཞིས་ཅིན་ཕིང་གིས་པཎ་ཆེན་ལ་བོད་བརྒྱུད་ནང་བསྟན་གྱི་རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་པོ་རྒྱུན་འཛིན་དང་། ཡིད་ལ་མེས་རྒྱལ་འཆང་བ་དང་སེམས་ལ་མི་དམངས་བཞག་སྟེ་བློ་བརྟན་འགྱུར་མེད་ཀྱིས་མེས་རྒྱལ་གོང་བུ་གཅིག་གྱུར་དང་མི་རིགས་མཐུན་སྒྲིལ་ཡོང་བར་སྲུང་སྐྱོང་བྱེད་རྒྱུ་དང་། ཆོས་ཀྱི་སྙིང་པོ་རྒྱས་འགྲེལ་ཧུར་བརྩོན་སྤེལ་ནས་བོད་བརྒྱུད་ནང་བསྟན་གྱི་བསྟན་བཅོས་ནང་གི་ལེགས་སྤེལ་ཉེས་འགོག་དང་། འདྲ་མཉམ་དཀྱེལ་པོ་ཆེ། དབུལ་སྐྱོར་གུད་སྐྱོབ་ལ་སོགས་པའི་དགེ་མཚན་ལྡན་པའི་བསམ་བློ་དར་སྤེལ་གཏོང་དགོས་ཤིང་། བརྩོན་འགྲུས་ཆེན་པོས་སློབ་སྦྱོང་དང་བློ་སྦྱོང་བྱས་ཏེ་ཆོས་ལུགས་ཀྱི་ཤེས་ཡོན་ཇེ་མཐོར་འགྲོ་བ་དང་ཀུན་སྤྱོད་གསོ་སྦྱོང་ཇེ་ལེགས་ཡོང་བར་བྱེད་དགོས་པ་དང་། མིའི་རིགས་ཀྱི་ཤེས་དཔལ་གྲུབ་འབྲས་དང་དེང་རབས་ཀྱི་ཚན་རིག་རིག་གནས་ཤེས་བྱ་ཡོད་དོ་ཅོག་སློབ་སྦྱོང་བྱས་ཏེ་རང་ཉིད་ཀྱི་མཐོང་རྒྱ་དང་བློ་རྒྱ་རྒྱུན་ཆད་མེད་པར་ཆེ་རུ་གཏོང་དགོས་པའི་རེ་བ་གནང་བ་མ་ཟད། མཇུག་ཏུ་ཞིས་ཅིན་ཕིང་གིས་པཎ་ཆེན་ལ་བསོད་བདེ་ཆེ་ཞིང་ཤེས་རབ་ལྡན་ལ་ཆོས་མགོ་ཐོན་པའི་སྨོན་འདུན་ཡང་ཞུས་གནང་བ་རེད།
         པཎ་ཆེན་གྱིས་ངེས་པར་དུ་པཎ་ཆེན་རིན་པོ་ཆེ་སྐུ་ཕྲེང་བཅུ་པ་མིག་དཔེར་བྱས་ཏེ་རྒྱལ་ཁབ་དཔལ་གྱིས་བརྒྱན་ཞིང་སེམས་ཅན་བདེ་ལམ་དུ་འགོད་པ་དང་། མེས་རྒྱལ་གོང་བུ་གཅིག་གྱུར་དང་མི་རིགས་མཐུན་སྒྲིལ་ཡོང་བར་སྲུང་སྐྱོང་མཐའ་གཅིག་ཏུ་བྱེད་རྒྱུ་དང་། ངེས་པར་དུ་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་སློབ་སྟོན་ནན་ཏན་གནང་བ་སྙིང་དབུས་སུ་བརྟན་པོར་ངེས་ཏེ་སྙིང་རུས་ཆེན་པོས་སློབ་སྦྱོང་བྱས་ནས་བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བ་དང་བོད་ལྗོངས་འཆམ་མཐུན་བརྟན་ལྷིང་ཡོང་བར་སྐུལ་སྤེལ་གཏོང་ཆེད་ནུས་པ་གང་ཡོད་ལེགས་སྐྱེས་སུ་ཕུལ་ཏེ་ཏང་དང་མི་དམངས་ཀྱི་བྱམས་བརྩེ་ཆེ་བའི་ཐུགས་རེ་སྟོང་ཟད་དུ་གཏན་ནས་གཏོང་གི་མེད་ཅེས་བསྟན་པ་རེད།
         ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀྲུང་དབྱང་འཐབ་ཕྱོགས་གཅིག་གྱུར་པུའི་པུའུ་ཀྲང་སུན་ཁྲུན་ལན་དང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀྲུང་དབྱང་གཞུང་ལས་ཐིང་གི་ཀྲུའུ་རེན་ལི་ཀྲན་ཧྲུའུ་གཉིས་ཀྱང་མཇལ་ཞུ་དང་ལེན་བྱེད་སྒོར་ཞུགས་པ་རེད།