མི་དམངས་དྲ་བའི་འཕྲིན། ཟླ་3ཚེས་12ཉིན་སྲོག་སྐྱོབ་རླངས་འཁོར་200པེ་ཅིང་ནས་གཅིག་མཇུག་གཉིས་མཐུད་ངང་ཐོན་ཏེ་ཤིན་ཅང་དང་། མཚོ་སྔོན། ནང་སོག ཀུའེ་ཀྲོའུ། ཧོ་ནན་སོགས་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཀྱི་རྒྱལ་ཁབ་རིམ་པའི་རྫོང་དབུལ་པོའི་སྨན་ཁང་15རུ་བསྐྱོད་རྒྱུ་རེད།
སྲོག་སྐྱོབ་རླངས་འཁོར་དེ་དག་གནད་སྨིན་དབུལ་སྐྱོར་བྱ་གཞག་ལ་ཡུན་རིང་གཞོལ་བའི་ཀྲུང་ཧྭ་སི་ཡོན་འདུ་འགོད་དབུལ་སྐྱོར་ཐེབས་རྩ་ལྷན་ཚོགས་ཀྱིས་པཱ་ཧྲ་སྤྱི་ཕན་དགེ་སྒྲུབ་ཐེབས་རྩ་དང་མཉམ་འབྲེལ་ཐོག་ཞལ་འདེབས་བརྒྱབ་པ་ཞིག་ཡིན་པ་དང་། བདེ་ཐང་དབུལ་སྐྱོར་དང་སྨན་བཅོས་དབུལ་སྐྱོར་སོགས་ཀྱི་བྱ་ཐབས་ཐོག་ནས་སྨན་བཅོས་ཐོན་ཁུངས་གཞི་རིམ་དང་གྲོང་གསེབ་དུ་འཁོར་རྒྱུག་ཐུབ་རྒྱུར་རོགས་རམ་བྱས་ཏེ། གྲོང་གསེབ་ཀྱི་མང་ཚོགས་དེ་བས་མང་བས་ཆེད་ལས་དང་སྟབས་བདེའི་སྨན་བཅོས་ཞབས་ཞུ་ལོངས་སྤྱོད་ཐུབ་པ་བྱ་རྒྱུ་རེད།
ད་ཐེངས་ཀྱི་ཞལ་འདེབས་དེ་ནི“སི་ཡོན་སྲོག་སྐྱོབ”རྣམ་གྲངས་ཀྱི་ཆ་ཤས་ཤིག་ཡིན་ཞིང་། ཀྲུང་ཧྭ་སི་ཡོན་འདུ་འགོད་དབུལ་སྐྱོར་ཐེབས་རྩ་ལྷན་ཚོགས་ཀྱིས་2013ལོའི་ཟླ་དང་པོར་ཕྱོགས་ཡོངས་ནས“སི་ཡོན་སྲོག་སྐྱོབ”རྣམ་གྲངས་སྤེལ་འགོ་ཚུགས་པ་དང་། 2020ལོར་སླེབས་སྐབས་རྒྱལ་ཡོངས་ཀྱི་རྒྱལ་ཁབ་རིམ་པའི་རྫོང་དབུལ་པོ་592ཚང་མར་སྲོག་སྐྱོབ་རླངས་འཁོར་3རེ་ཞལ་འདེབས་རྒྱག་རྒྱུའི་དམིགས་ཚད་གཏན་འཁེལ་བྱས་ཡོད། མིག་སྔའི་བར་སྲོག་སྐྱོབ་རླངས་འཁོར་1200ལྷག་ཙམ་ཞལ་འདེབས་བརྒྱབ་པ་དེ་དག་རྒྱལ་ཡོངས་ཀྱི་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་29ལ་ཁྱབ་ནས་མང་ཚོགས་ཁྲི་7000ལྷག་ཙམ་ལ་ཕན་པ་ཐོབ་ཡོད་པ་རེད།
ངོ་སྤྲོད་བྱས་པར་གཞིགས་ན། “སི་ཡོན་སྲོག་སྐྱོབ”རྣམ་གྲངས་ལག་ལེན་བསྟར་བ་དེས་ཕྱོགས་གཅིག་ནས་གཞི་རིམ་གྱི་སྨན་བཅོས་འཕྲོད་བསྟེན་ཆ་རྐྱེན་ལེགས་སུ་གཏོང་བ་དང་། གཞི་རིམ་སྨན་བཅོས་ཞབས་ཞུའི་ཆུ་ཚད་དང་གེགས་སྐྱོབ་རོགས་སྐྱོབ་ནུས་པ་ཆེ་རུ་གཏོང་རྒྱུར་ཕན་ཐོགས་ཡོད་པ་དང་། ཕྱོགས་གཞན་ཞིག་ནས“ཁེ་ཕན་ལས་སྤྱི་ཕན་ལ་སྐུལ་གཏོང”བྱ་རྒྱུ་འཚོལ་ཞིབ་བྱས་ཏེ་རོགས་སྐྱོར་བྱ་ཡུལ་སྨན་ཁང་གིས་གཞི་རིམ་སྨན་བཅོས་ཞབས་ཞུའི་ཐོན་ཁུངས་སྤྱོད་རྒྱུར་སྐུལ་འདེད་གཏོང་རྒྱུ་དང་། སྤྱི་ཕན་བྱེད་སྒོ་སྤེལ་བ་དང་མང་ཚོགས་དེ་བས་མང་བས་སྟབས་བདེའི་ངང་སྨན་བཅོས་ཞབས་ཞུ་ལོངས་སྤྱོད་ཐུབ་པ་བྱས་ནས་སྤྱི་ཕན་ཞལ་འདེབས་བེད་སྤྱོད་ཡག་པོ་ཐུབ་རྒྱུར་སྐུལ་འདེད་བཏང་བ་རེད།
