རྒྱུན་རིང་ལག་ལེན་བསྟར་བའི་སྨན་རྫས་ཀྱི་སྣོན་ཆའི་སྲིད་ཇུས་མེད་པར་བཟོས་ཏེ། སྨན་རྫས་དང་སྨན་བཅོས་ཡོ་བྱད་ཞིབ་མཆན་འགོད་པའི་ལམ་ལུགས་སྒྱུར་བཅོས་འགག་གནད་ལས་སྒྲོལ་ཐུབ་ཡོད། གྲོང་གསེབ་ཀྱི་ཐོན་འགན་གཙང་ལེན་ས་ཞིང་གི“དབང་གསུམ”ལོགས་འཛུགས་སྒྱུར་བཅོས་དང་དབང་ཆ་གཏན་འཁེལ་བྱེད་ཁྱོན་80%ལས་བརྒལ་བ་ཁྱབ་སྤེལ་བྱས་ཤིང་། ཞིང་ལས་ཐོན་རྫས་གལ་ཆེན་གསོག་ཉར་ལམ་ལུགས་སྒྱུར་བཅོས་བྱས་ཡོད། གཙོ་ནུས་ཐོན་ཁུལ་གྱི་ལམ་ལུགས་འཐུས་སྒོ་ཚང་དུ་བཏང་བ་དང་། སྐྱེ་ཁམས་དཔལ་ཡོན་གྱི་ཕན་འབྲས་དཔྱད་དཔོག་དང་འགན་འཁྲི་བདའ་འདེད་ལམ་ལུགས་བཙུགས་ནས། ཆུ་དཔོན་ལམ་ལུགས་དང་མཚེའུ་དཔོན་ལམ་ལུགས་ཁྱབ་སྤེལ་བྱས་ཤིང་། ཞིང་ཆེན་རིམ་པ་མན་གྱི་ཁོར་ཡུག་སྲུང་སྐྱོང་སྒྲིག་གཞི་ཐད་ཀར་དོ་དམ་བྱེད་པའི་ལམ་ལུགས་སྒྱུར་བཅོས་བྱེད་པའི་ཚོད་ལྟ་བྱེད་གནས་སྤེལ་ཡོད། ཁྱབ་ཁོངས་ཁག་གི་སྒྱུར་བཅོས་གཏིང་ཟབ་ཏུ་སྤེལ་བས། དཔལ་འབྱོར་དང་སྤྱི་ཚོགས་རྒྱུན་མཐུད་སྐྱོན་བྲལ་ངང་ནས་འཕེལ་རྒྱས་ཡོང་བར་སྐུལ་འདེད་ཐེབས་ཡོད།
（ལྔ）ཕྱི་ཕྱོགས་སུ་སྒོ་འབྱེད་པའི་གཞི་རྩའི་རྒྱལ་ཇུས་མཐའ་འཁྱོངས་བྱས་པ་དང་། མཉམ་ལས་མཉམ་རྒྱལ་གང་ཐུབ་བྱས་པས། སྒོ་འབྱེད་ཅན་གྱི་དཔལ་འབྱོར་ཆུ་ཚད་མཐོ་རུ་མངོན་གསལ་སོང་ཡོད། “རྒྱུད་གཅིག་ལམ་གཅིག”མཉམ་སྐྲུན་དར་སྤེལ་དང་སྐུལ་འདེད་བཏང་ནས། ཨེ་ཤེ་ཡའི་དངུལ་འཇོག་དངུལ་ཁང་འཛུགས་གཉེར་གྱི་འགོ་བཙུགས་པ་དང་། དར་གོས་འགྲུལ་ལམ་གྱི་ཐེབས་རྩ་བཙུགས་ཤིང་། ཕན་ཚུན་སྦྲེལ་མཐུད་དང་དཔལ་འབྱོར་ཉོ་ཚོང་གི་རྣམ་གྲངས་གལ་ཆེན་ཁག་གཅིག་གཉེར་འགོ་ཚུགས་ཡོད། ཧྲང་ཧའེ་སོགས་རང་མོས་ཉོ་ཚོང་ཚོད་ལྟ་ཁུལ་11བཙུགས་ནས་སྒྱུར་བཅོས་ཚོད་ལྟའི་གྲུབ་འབྲས་ཁག་གཅིག་རྒྱལ་ཡོངས་སུ་ཁྱབ་སྤེལ་བྱས་ཡོད། ཕྱིར་གཏོང་ཁྲལ་སློག་འཁུར་པོའི་ལམ་སྲོལ་སྒྱུར་བཅོས་བྱས་པ་དང་། ཁྲལ་སློག་འཕར་གྲངས་ཚང་མ་ཀྲུང་དབྱང་ནོར་སྲིད་ཀྱིས་འཁུར་ཡོད། རྒྱལ་ཁོངས་ལས་བརྒལ་བའི་དྲ་ཐོག་ཚོང་དོན་ཕྱོགས་བསྡུས་ཚོད་ལྟ་ཁུལ་13བཙུགས་ཤིང་། རྒྱལ་སྤྱིའི་ཉོ་ཚོང་གི“དཀར་ཁུང་ཆིག་རྐྱང”རྒྱལ་ཡོངས་སུ་ཁྱབ་པ་དང་། དངོས་ཟོག་འགག་སྒོ་བརྒྱུད་པའི་དུས་ཚོད་ཆ་སྙོམས་ཕྱེད་ཀ་ཡན་ཇེ་ཐུང་དུ་བཏང་བས། ཕྱིར་གཏོང་ནང་འདྲེན་བརྟན་པོའི་ངང་ནས་བཟང་པོར་འགྱུར་བཞིན་ཡོད། ཕྱི་རྒྱལ་གྱི་ཚོང་པས་མ་དངུལ་འཇོག་པར་ཞིབ་མཆན་འགོད་པའི་ལམ་ལུགས་ནས་བཀག་རྒྱ་གསལ་ཐོའི་དོ་དམ་ཕྱོགས་སུ་བསྒྱུར་ཏེ། ཚོད་འཛིན་རང་བཞིན་བྱེད་ཐབས་ཀྱི་གསུམ་ཆ་གཉིས་ཉུང་དུ་བཏང་ཡོད། ཕྱི་རྒྱལ་ཚོང་པས་མ་དངུལ་འཇོག་པའི་གྲུབ་ཚུལ་ལེགས་སྒྱུར་བྱས་པ་དང་། ལག་རྩལ་མཐོ་བའི་ཐོན་ལས་ཀྱིས་ཟིན་ཚད་ལྡབ་གཅིག་འཕར་ཡོད། རིག་སྟོབས་ནང་འདྲེན་བྱེད་ཤུགས་ཆེ་རུ་བཏང་བས། ཀྲུང་གོར་ལས་ཀ་བྱེད་པར་ཡོང་མཁན་ཕྱི་རྒྱལ་གྱི་ཆེད་མཁས་40%འཕར་ཡོད། ཕྱི་ཕྱོགས་ལ་མ་དངུལ་འཇོག་པར་སྐྱོན་བྲལ་ངང་འཕེལ་རྒྱས་ཡོང་བའི་ཁྲིད་སྟོན་བྱས་ཡོད། རྒྱལ་སྤྱིའི་ཐོན་ནུས་མཉམ་ལས་ལ་སྐུལ་སྤེལ་བཏང་སྟེ། མྱུར་བགྲོད་མེ་འཁོར་དང་ཉིང་རྡུལ་གློག་ཁང་སོགས་པའི་སྒྲིག་ཆས་འཛམ་གླིང་དུ་བསྐྱོད་ཡོད། རང་མོས་ཉོ་ཚོང་ཆོད་ཡིག་8གསར་དུ་བཞག་པ་དང་རིམ་པ་སྤར་ཡོད། ཧྲང་ཧའེ་དང་ཞང་ཀང་ཐད་སྦྲེལ་དང་། ཧྲེན་ཀྲེན་དང་ཞང་ཀང་ཐད་སྦྲེལ། བུན་འཛིན་ཐད་སྦྲེལ་བཅས་གཅིག་རྗེས་གཉིས་མཐུད་དུ་བྱེད་འགོ་བརྩམས་ཤིང་། མི་དམངས་ཤོག་སྒོར་དེ་རྒྱལ་སྤྱིའི་དངུལ་ལོར་ཐེབས་རྩའི་རྩ་འཛུགས་ཀྱི་དམིགས་བསལ་དངུལ་ལེན་དབང་ཡོད་པའི་དངུལ་ལོར་གྲལ་དུ་ཞུགས་པས། མི་དམངས་ཤོག་སྒོར་རྒྱལ་སྤྱི་ཅན་དུ་འགྱུར་བའི་གོམ་སྟབས་གལ་ཆེན་སྤོས་ཡོད། ཀྲུང་གོའི་སྒོ་མོ་ཇེ་ཆེར་ཕྱེ་བས། རང་ངོས་འཕེལ་རྒྱས་ཡོང་བར་ཡར་སྐུལ་ནུས་ལྡན་བྱུང་བ་དང་། འཛམ་གླིང་ལ་གོ་སྐབས་འགངས་ཆེན་ཡང་བསྐྲུན་ཡོད།
（དྲུག）ས་ཁོངས་མཐུན་སྦྱོར་ངང་འཕེལ་རྒྱས་གཏོང་བ་དང་གྲོང་ཁྱེར་དང་གྲོང་རྡལ་ཅན་གསར་པའི་འཐབ་ཇུས་ལག་ལེན་དུ་བསྟར་བ་མཐའ་འཁྱོངས་བྱས་ཏེ། དོ་མཉམ་པར་འཕེལ་རྒྱས་ཡོང་བའི་སྐུལ་འདེད་གང་ཐུབ་བཏང་བས་འཕར་སྣེ་དང་འཕར་རྒྱུད་གསར་པ་མགྱོགས་པོར་འཚར་ལོངས་བྱུང་ཡོད། པེ་ཅིང་ཐེན་ཅིན་ཧོ་པེ་གསུམ་མཐུན་སྦྱོར་ངང་འཕེལ་རྒྱས་དང་འབྲི་ཆུའི་དཔལ་འབྱོར་རྒྱུད་འཕེལ་རྒྱས་གཏོང་བར་སྐུལ་སྤེལ་ཧུར་ཐག་བཏང་སྟེ། འབྲེལ་ཡོད་ཀྱི་འཆར་གཞི་བཟོས་ནས་ལག་བསྟར་བྱས་པ་དང་། ལས་གཞི་འགངས་ཆེན་ཁག་གཅིག་འཛུགས་སྐྲུན་བྱས་ཡོད། ནུབ་རྒྱུད་གསར་སྤེལ་དང་། བྱང་ཤར་དར་སྤེལ། དབུས་རྒྱུད་འབུར་ཐོན། ཤར་རྒྱུད་སྔོན་ལ་འཕེལ་རྒྱས་ཡོང་བར་བྱེད་པའི་སྒྱུར་བཅོས་གསར་གཏོད་ཀྱི་བྱེད་ཐབས་རབ་དང་རིམ་པ་བཏོན་ཡོད། གསར་བརྗེའི་གནས་རྙིང་དང་། མི་རིགས་ས་ཁུལ། མཐའ་མཚམས་ས་ཁུལ། དབུལ་ཕོངས་ས་ཁུལ་བཅས་ལ་རྒྱབ་སྐྱོར་བྱེད་ཤུགས་ཆེ་རུ་བཏང་བ་དང་། བོད་ལྗོངས་ཞིན་ཅང་མཚོ་སྔོན་གསུམ་ལ་རོགས་སྐྱོར་ལས་དོན་སྒྲུབ་ཤུགས་ཆེ་རུ་བཏང་ཡོད། རྒྱ་མཚོ་སྲུང་སྐྱོང་དང་གསར་སྤེལ་ལ་སྐུལ་སྤེལ་གོ་རིམ་ལྡན་པར་བྱས་ཡོད། གྲོང་ཁྱེར་ཁྱུ་ཚོགས་གཙོ་བོའི་འཆར་འགོད་ལག་བསྟར་བྱས་པ་དང་། གྲོང་ཁྱེར་ཆེ་འབྲིང་ཆུང་གསུམ་དང་གྲོང་ཁྱེར་དང་གྲོང་རྡལ་ཆུང་རིགས་མཐུན་སྦྱོར་ངང་འཕེལ་རྒྱས་ཡོང་བར་བྱས་ཡོད། གྲོང་ཁྱེར་མང་ཆེ་བས་གཞིས་ཆགས་ཀྱི་ཚོད་འཛིན་ལྷུག་ཏུ་བཏང་བ་དང་། གནས་ཆགས་འཛིན་ཡིག་ལམ་ལུགས་ཕྱོགས་ཡོངས་ནས་ལག་བསྟར་བྱས་ཤིང་། གྲོང་ཁྱེར་དང་གྲོང་རྡལ་གྱི་མ་མཐའི་སྤྱི་པའི་ཞབས་ཞུ་རྒྱུན་སྡོད་མི་འབོར་ལ་ཁྱབ་པར་བྱས་ཡོད། གྲོང་ཁྱེར་དང་གྲོང་གསེབ་ཀྱི་ས་ཁོངས་འཕེལ་རྒྱས་མཐུན་སྦྱོར་རང་བཞིན་མངོན་གསལ་ཆེ་རུ་ཕྱིན་ཡོད།
（བདུན）མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་དང་། དམངས་འཚོ་འགན་སྲུང་དང་ལེགས་བཅོས་གང་ཐུབ་བྱས་པས་མི་དམངས་མང་ཚོགས་ཀྱི་ཐོབ་སྣང་མུ་མཐུད་ཆེ་རུ་སོང་ཡོད། ནོར་ཤུགས་དཀའ་ངལ་ཆེ་བའི་གནས་ཚུལ་འོག དམངས་འཚོའི་གཏོང་སྒོ་རྒྱུན་ཆད་མེད་པར་མང་དུ་བཏང་ཡོད། གནད་འཕིགས་དབུལ་སྐྱོར་དང་གནད་འཕིགས་དབུལ་སྒྲོལ་ཕྱོགས་ཡོངས་ནས་སྐུལ་སྤེལ་བྱས་ཤིང་། ཀྲུང་དབྱང་གིས་གཅིག་གྱུར་འཆར་འགོད་དང་། ཞིང་ཆེན་གྱིས་སྤྱི་འགན་འཁུར་བ། གྲོང་ཁྱེར་དང་རྫོང་གིས་དོན་འཁྱོལ་དམ་འཛིན་བྱེད་པའི་ལས་ཀའི་ལམ་སྲོལ་འཐུས་སྒོ་ཚང་དུ་བཏང་ཡོད། ཀྲུང་དབྱང་ནོར་སྲིད་ཀྱིས་ལོ་ལྔའི་རིང་ཆེད་དོན་དབུལ་སྐྱོར་མ་དངུལ་སྒོར་དུང་ཕྱུར་2800ལྷག་ཙམ་བཏང་བ་དང་། དགེ་མཚན་ལྡན་པའི་ལས་ཞུགས་སྲིད་ཇུས་ལག་བསྟར་བྱས་པས། ཁྱུ་ཚོགས་གཙོ་གནད་ཀྱི་ལས་ཞུགས་ལ་འགན་སྲུང་ལེགས་ཙམ་ཐུབ་ཡོད། སློབ་གསོ་སྔོན་ལ་འཕེལ་རྒྱས་གཏོང་བ་མཐའ་འཁྱོངས་བྱས་པ་དང་། ནོར་སྲིད་རང་བཞིན་གྱི་སློབ་གསོའི་གྲོན་དངུལ་གྱིས་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་གྱི་བསྡུར་ཚད་བསྟུད་མར་4%ལས་བརྒལ་ཡོད། གྲོང་གསེབ་ཀྱི་འོས་འགན་སློབ་གསོ་ཞན་སའི་སློབ་གྲྭའི་སློབ་གཉེར་ཆ་རྐྱེན་ལེགས་བཅོས་བྱས་ཏེ། གྲོང་ཚོའི་དགེ་རྒན་གྱི་ཐོབ་ཐང་ལེགས་སུ་བཏང་བ་དང་། འཚོ་བཅུད་ལེགས་བཅོས་འཆར་གཞིས་གྲོང་གསེབ་ཀྱི་སློབ་མ་ཁྲི་3600ལྷག་ཙམ་ལ་ཕན་ཡོད། འཛམ་གླིང་གི་སློབ་ཆེན་རྩེ་གྲ་དང་རིག་ཚན་རྩེ་གྲ་འཛུགས་སྐྱོང་བྱེད་འགོ་བརྩམས་ཡོད། གཙོ་གནད་སློབ་ཆེན་གྱིས་གྲོང་གསེབ་དང་དབུལ་ཕོངས་ས་ཁུལ་གྱི་སློབ་མ་ཆེད་མངགས་བསྡུ་བའི་མི་གྲངས་ཁྲི་1ནས་ཁྲི་10བར་འཕར་སྣོན་བྱས་ཡོད། སློབ་གྲྭ་ཁག་གི་ཁྱིམ་ཚང་དཀའ་ངལ་ཡོད་པའི་སློབ་མར་རོགས་དངུལ་སྤྲོད་ཤུགས་ཆེ་རུ་བཏང་བས་མི་ཐེངས་གྲངས་དུང་ཕྱུར་4.3ལ་ཕན་ཡོད། ངལ་རྩོལ་ལོ་ཚད་མི་འབོར་གྱིས་སློབ་གསོ་མྱོང་བའི་ལོ་ཚད་ཆ་སྙོམས་ལོ་10.5འཕར་ཡོད། གྲོང་མིའི་གཞི་རྩའི་སྨན་བཅོས་འགན་བཅོལ་མི་རེར་ནོར་སྲིད་རོགས་དངུལ་གྱི་ཚད་གཞི་ཆ་སྙོམས་སྒོར་240ནས་450བར་སྤར་ཡོད་ཅིང་། ནད་གཞི་ཆེ་རིགས་འགན་བཅོལ་ལམ་ལུགས་གཞི་རྩའི་ཆ་ནས་བཙུགས་པ་དང་མི་ཐེངས་གྲངས་ཁྲི་1700ལྷག་ཙམ་ལ་ཕན་ཡོད། གཞན་སར་སྨན་པ་བསྟེན་པ་དང་སྨན་ཁང་དུ་བསྡད་པའི་འགྲོ་གྲོན་ཐད་ཀར་རྩིས་རྒྱག་མངོན་འགྱུར་བྱུང་བ་དང་། རིམ་དབྱེ་ནད་བརྟག་སྨན་བཅོས་དང་སྨན་བཅོས་མཉམ་འབྲེལ་སྒྲིག་གཞི་འཛུགས་སྐྲུན་སྐུལ་སྤེལ་ཇེ་མགྱོགས་སུ་བཏང་ཡོད། ལས་འཁྱུར་ངལ་གསོ་བྱས་པའི་མི་སྣའི་མ་མཐའི་རྒན་གསོའི་འཚོ་དངུལ་བསྟུད་མར་ཚུལ་མཐུན་ཐོག་མཐོ་རུ་བཏང་ཡོད། མ་མཐའི་འགན་སྲུང་དང་གཟིགས་སྐྱོང་སོགས་པའི་ཚད་གཞི་མཐོ་རུ་བཏང་བ་དང་། སྤྱི་ཚོགས་ཀྱི་རོགས་སྐྱོབ་ལམ་ལུགས་ལེགས་བཅོས་བྱས་པས། མ་མཐའི་འགན་སྲུང་མི་སྣ་དང་དཀའ་ངལ་ཧ་ཅང་ཆེ་བའི་མང་ཚོགས་ཁྲི་6000ལ་ཉེ་བའི་གཞི་རྩའི་འཚོ་བ་འགན་སྲུང་ཐུབ་ཡོད། དཀའ་ངལ་ཆེ་བ་དང་དབང་པོ་སྐྱོན་ཅན་ཚབས་ཆེར“ཁ་གསབ་རིགས་གཉིས་”ཀྱི་ལམ་ལུགས་བཙུགས་པས། མི་ཁྲི་2100ལྷག་ཙམ་ལ་ཕན་ཡོད། ཕྲུ་གུ་གཉིས་ཀྱི་སྲིད་ཇུས་ཕྱོགས་ཡོངས་ནས་ལག་ལེན་དུ་བསྟར་ཡོད། རིག་གནས་བྱ་གཞག་འཕེལ་རྒྱས་མགྱོགས་སུ་བཏང་བས། རིག་གནས་ཐོན་རྫས་ལོ་རེར་ཆ་སྙོམས་13%ཡན་འཕར་ཡོད། དམངས་ཡོངས་ཀྱི་ལུས་སྦྱོང་རྒྱ་ཁྱབ་ཏུ་སྤེལ་བ་དང་ལུས་རྩལ་ཕོ་རྒོད་རྣམས་ཀྱིས་གྲུབ་འབྲས་བཟང་པོ་བླངས་ཡོད།
（བརྒྱད）མི་དང་རང་བྱུང་ཁམས་ཞི་མཐུན་ངང་འཕེལ་རྒྱས་ཡོང་བ་མཐའ་འཁྱོངས་དང་། ཁོར་ཡུག་སྦགས་བཙོག་བཅོས་སྐྱོང་གང་ཐུབ་བྱས་པས། སྐྱེ་ཁམས་དཔལ་ཡོན་འཛུགས་སྐྱོང་ལ་ཕན་འབྲས་མངོན་གསལ་དོད་པོ་ཐོབ་ཡོད། རི་སྔོན་ཆུ་དྭངས་ནི་གསེར་རི་དངུལ་རི་ཡིན་པའི་འདུ་ཤེས་བཅངས་ནས། ཆོད་སེམས་དང་སྟོབས་ཤུགས་སྔར་མེད་ལ་བརྟེན་ནས་སྐྱེ་ཁམས་ཁོར་ཡུག་སྲུང་སྐྱོང་བྱེད་ཤུགས་ཆེ་རུ་བཏང་ཡོད། རླུང་ཁམས་ཆེན་མོའི་སྦགས་བཙོག་བཅོས་སྐྱོང་ཤུགས་ཆེན་བྱས་ཤིང་། གཙོ་གནད་ས་ཁུལ་གྱི་ཕྲ་རྡུལ（PM2.5）གར་ཚད་ཆ་སྙོམས་30%ཡན་ཆག་ཡོད། རྡོ་སོལ་སིལ་མ་བཅོས་སྐྱོང་བྱེད་ཤུགས་ཆེ་རུ་གཏོང་བ་དང་། ལས་རིགས་གཙོ་གནད་ཀྱི་ནུས་བསྲི་སྙིགས་འཕྲིར་སྐུལ་སྤེལ་བཏང་བས། རྡོ་སོལ་གློག་ཁང་འཕྲུལ་འཁོར་ཚན་པ་71%གི་སྦགས་བཙོག་འབུད་ཚད་ཉུང་ཤོས་མངོན་འགྱུར་བྱུང་ཡོད། ནུས་ཁུངས་ཀྱི་གྲུབ་ཚུལ་ལེགས་སྒྱུར་བྱས་པ་དང་། རྡོ་སོལ་འཛད་སྤྱོད་ཀྱི་བསྡུར་ཚད་བརྒྱ་ཆའི་གཞི་གྲངས་8.1ཆག་ཅིང་། ནུས་ཁུངས་གཙང་མའི་འཛད་སྤྱོད་ཀྱི་བསྡུར་ཚད་བརྒྱ་ཆའི་གཞི་གྲངས་6.3འཕར་ཡོད། འབར་སྣུམ་གྱི་རྒྱུ་སྤུས་དག་ཏུ་བཏང་བ་དང་། རྟགས་སེར་རླངས་འཁོར་དང་རླངས་འཁོར་རྙིང་པ་ཁྲི་2000ལྷག་ཙམ་དོར་ཡོད། གཙང་པོ་བཞུར་རྒྱུད་དང་མཚོ་རྒྱུད་གཙོ་བོའི་ཆུའི་སྦགས་བཙོག་འགོག་བཅོས་བྱེད་ཤུགས་ཆེ་རུ་བཏང་ཞིང་། རྫས་ལུད་དང་ཞིང་སྨན་བེད་སྤྱོད་བྱེད་ཚད་འཕར་སྣོན་མེད་པ་མངོན་འགྱུར་བྱུང་ཡོད། སྐྱེ་ཁམས་འགངས་ཆེན་སྲུང་སྐྱོང་དང་ཉམས་གསོའི་ལས་གཞིར་སྐུལ་སྤེལ་བཏང་བ་དང་། ཞིང་དོར་ནགས་སྤེལ་རྩྭ་འདེབས་དང་འདམ་རྭ་བསྐྱར་གསོ་དང་རྒྱ་བསྐྱེད་པ། ཐང་རྒོད་ཅན་དང་། བྱེ་རྡོ་ཅན། ས་ཆུ་ཤོར་ཚུལ་བཅས་ཕྱོགས་བསྡུས་བཅོས་སྐྱོང་བྱེད་ཤུགས་ཆེ་རུ་བཏང་ཡོད། ཀྲུང་དབྱང་གི་ཁོར་ཡུག་སྲུང་སྐྱོང་ལྟ་ཞིབ་བྱས་ཏེ། ཁྲིམས་འགལ་གྱི་གྱོད་དོན་ཞིབ་བཤེར་ཐག་གཅོད་ནན་པོར་བྱས་ཡོད། 《ཕ་རི་སིའི་གྲོས་མཐུན་》ལ་མིང་རྟགས་བཀོད་ནས་གོ་ཆོད་པར་སྐུལ་འདེད་དགེ་མཚན་ལྡན་པར་བྱས་ཤིང་། རང་རྒྱལ་གྱིས་གོ་ལ་ཧྲིལ་པོའི་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་ཁྲོད་ནུས་པ་གལ་ཆེན་བཏོན་ཡོད། （དགུ）ཁྲིམས་མཐུན་ལྟར་སྲིད་གཞུང་གི་འགན་ནུས་ཕྱོགས་ཡོངས་ནས་ལག་བསྟར་མཐའ་འཁྱོངས་བྱས་པ་དང་། སྤྱི་ཚོགས་བཅོས་སྐྱོང་བྱེད་ཤུགས་ཆེ་རུ་བཏང་བ་དང་གསར་གཏོད་གང་ཐུབ་བྱས་པས་སྤྱི་ཚོགས་ཞི་མཐུན་དང་བརྟན་ལྷིང་རྒྱུན་མཐུད་བྱུང་ཡོད། རྒྱལ་ཡོངས་མི་དམངས་འཐུས་ཚོགས་ཀྱི་རྒྱུན་ལས་ཨུ་ལྷན་ལ་བཅའ་ཁྲིམས་95གཏན་འབེབས་དག་བཅོས་གནང་བྱར་ཕུལ་བ་དང་། སྲིད་འཛིན་ཁྲིམས་སྲོལ་195གཏན་འབེབས་དག་བཅོས་བྱས་ཤིང་། སྡེ་ཚན་གྱི་སྒྲིག་ཡིག་འབོར་ཆེན་ཞིག་བཟོ་བཅོས་བརྒྱབ་པའམ་ཡང་ན་མེད་པར་བཟོས་ཡོད། ཞིང་ཆེན་དང་གྲོང་ཁྱེར་དང་རྫོང་སྲིད་གཞུང་སྡེ་ཚན་གྱིས་དབང་འགན་གསལ་ཐོ་གཏན་འབེབས་དང་ཁྱབ་བསྒྲགས་བྱས་ཡོད། རྒྱལ་སྲིད་སྤྱི་ཁབ་ཁང་གི་ལྟ་སྐུལ་ཞིབ་བཤེར་ཆེན་མོ་དང་ཆེད་དོན་ལྟ་སྐུལ་ཞིབ་བཤེར་བྱས་ནས། བྱས་རྗེས་ཧུར་ཐག་འཇོག་པ་དང་ཕན་འབྲས་འབུར་དུ་ཐོན་པར་གཟེངས་བསྟོད་དང་སྲིད་ཇུས་ཐོག་ནས་སྐུལ་ལྕག་བཏང་ཞིང་། ལས་ཀ་ཡག་པོ་མི་བྱེད་མཁན་ལ་འགན་འཁྲི་རྩད་གཅོད་ནན་པོར་བྱས་ཡོད། གྲོང་ཁྱེར་དང་གྲོང་གསེབ་ཀྱི་གཞི་རིམ་བཅོས་སྐྱོང་གསར་གཏོད་བྱས་ཡོད། ཡིག་སྐུར་ངོ་བཅར་གྱི་ལས་དོན་ལམ་ལུགས་འཐུས་སྒོ་ཚང་དུ་བཏང་ཞིང་། བཅའ་ཁྲིམས་ཀྱི་རོགས་སྐྱོར་བྱེད་ཁོངས་ཆེ་རུ་བཏང་ཡོད། བདེ་འཇགས་ཐོན་སྐྱེད་ཁྱབ་ཁོངས་ཀྱི་སྒྱུར་བཅོས་དང་འཕེལ་རྒྱས་ལ་ཡར་སྐུལ་བྱས་པས། བྱུར་ཉེས་བསྡོམས་འབོར་དང་བྱུར་ཉེས་ཚབས་ཆེན་དང་ཆེས་ཆེ་རིགས་ཀྱི་གྲངས་འབོར་བསྟུད་མར་ཆག་ཡོད། བཟའ་བཅའ་དང་སྨན་རྫས་ལ་ལྟ་སྐུལ་དོ་དམ་སྒྱུར་བཅོས་འཐུས་ཚང་བྱས་ནས། ཉེན་ཁ་འབྱུང་རིམ་ཧྲིལ་པོར་ལྟ་སྡོམ་བྱེད་ཤུགས་ཆེ་རུ་བཏང་ཡོད། ས་ཡོམ་དང་ཆུ་ལོག་གི་གོད་ཆག་དམིགས་བསལ་ཆེན་པོ་སོགས་གནོད་འགོག་གནོད་སེལ་མུག་སྐྱོབ་བཅས་ཀྱི་ལས་དོན་ལ་ཤུགས་སྣོན་བརྒྱབ་སྟེ། རིམ་དབྱེ་འགན་འཁུར་དང་ཕན་ཚུན་ལས་རེས་ཀྱི་བབ་བསྟུན་ལམ་སྲོལ་འཐུས་ཚང་དུ་བཏང་བས། གནོད་འཚེའི་གྱོང་གུན་ཆེས་ཆེར་ཆག་པར་བྱས་ཡོད། རྒྱལ་ཁབ་ཀྱི་བདེ་འཇགས་ལ་ཤུགས་སྣོན་བརྒྱབ་ཡོད། སྤྱི་ཚོགས་བདེ་སྐྱོང་གི་སྔོན་འགོག་ཚོད་འཛིན་མ་ལག་འཐུས་སྒོ་ཚང་དུ་བཏང་བ་དང་། ཁྲིམས་འགལ་ཉེས་གསོག་སྣ་ཚོགས་ལ་ཁྲིམས་མཐུན་ལྟར་རྡུང་རྡེག་བཏང་ནས། སྤྱི་པའི་བདེ་འཇགས་སྟོབས་དང་ལྡན་པར་སྲུང་སྐྱོང་བྱས་ཡོད།
ཏང་ཀྲུང་དབྱང་གི་ཕྱོགས་ཡོངས་ནས་ཏང་ནན་པོར་སྐྱོང་བའི་བཀོད་པ་ལག་བསྟར་དོན་འཁྱོལ་བྱས་ནས་ཏང་སྲོལ་དང་སྲིད་དོན་གཙང་སྐྱོང་དང་རུལ་རྒོལ་གྱི་འཐབ་རྩོད་བྱེད་ཤུགས་ཆེ་རུ་བཏང་ཡོད། ཏང་གི་མང་ཚོགས་ལམ་ཕྱོགས་ཀྱི་སློབ་གསོའི་ལག་ལེན་བྱེད་སྒོ་དང་། “ནན་གསུམ་དྲང་གསུམ”གྱི་ཆེད་དོན་སློབ་གསོ། “སློབ་གཉིས་བྱེད་གཅིག”སློབ་སྦྱོང་གི་སློབ་གསོ་བཅས་གཏིང་ཟབ་སྤེལ་ཞིང་། ཏང་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དོན་འཁྱོལ་ནན་པོར་བྱས་ནས། “སྤྱོད་ཚུལ་བཞི”རྒྱུན་སྲིང་ལྷོད་མེད་ངང་ཡོ་བསྲང་དང་། རྒྱལ་སྲིད་སྤྱི་ཁྱབ་ཁང་གི“བསྲུང་བྱ་རྣམ་གསུམ”ལག་བསྟར་ནན་པོར་བྱས་ཡོད། སྲིད་གཞུང་གི་རང་བཞིན་ལྡན་པའི་རྒྱས་སྤྲོས་ཁང་བཟང་གསར་སྐྲུན་བྱེད་རིགས་དང་ནོར་སྲིད་ཀྱིས་འཚོ་སྐྱོང་བྱེད་མི་བསྡོམས་འབོར་ཚོད་འཛིན་ནན་པོར་བྱས་པ་དང་། “གཞུང་གསུམ”གྲོན་དངུལ་ཇེ་ཆེར་བཅག་ཡོད། སྲིད་འཛིན་ལྟ་ཞིབ་དང་རྩིས་བཤེར་ལྟ་སྐུལ་བྱེད་ཤུགས་ཆེ་རུ་བཏང་ཡོད། ཁྲིམས་འགལ་སྒྲིག་འགལ་གྱི་བྱ་སྤྱོད་རྩད་ཞིབ་ཐག་གཅོད་དང་ཡོ་བསྲང་མཐའ་གཅིག་ཏུ་བྱས་ཤིང་། རུལ་སུངས་པར་ཉེས་ཆད་ནན་པོར་བཅད་པས། རུལ་སུངས་ལ་རྒོལ་བའི་འཐབ་རྩོད་ཟིལ་གནོན་རང་བཞིན་གྱི་རྣམ་པ་ཆགས་པ་མ་ཟད་འཕེལ་རྒྱས་བརྟན་པོའང་བྱུང་ཡོད།
འཐུས་མི་རྣམ་པ།
འདས་ཟིན་པའི་ལོ་ལྔའི་རིང་ལ། མི་རིགས་དང་། ཆོས་ལུགས། ཕྱིར་སྡོད་རང་མིའི་ལས་དོན་སོགས་ཀྱི་ལས་ཀ་གསར་གཏོད་ཀྱིས་སྐུལ་སྤེལ་བྱས་ཡོད། མི་རིགས་ས་ཁུལ་མགྱོགས་མྱུར་ངང་འཕེལ་རྒྱས་ཡོང་བར་རྒྱབ་སྐྱོར་བྱས་པས། མི་རིགས་མཐུན་སྒྲིལ་ཡར་ཐོན་གྱི་བྱ་གཞག་ལ་ཡར་རྒྱས་མགྱོགས་པོ་བྱུང་ཡོད། ཆོས་ལུགས་ཀྱིས་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བར་དགེ་མཚན་ལྡན་པའི་སྣེ་ཁྲིད་བྱས་ཤིང་། ཕྱིར་སྡོད་སྤུན་ཟླ་དང་ཕྱིར་ལོག་རང་མི་དང་ཕྱིར་སྡོད་རང་མིས་རྒྱལ་ཁབ་དེང་རབས་ཅན་དུ་འཛུགས་སྐྲུན་བྱེད་པའི་ནང་དམིགས་བསལ་གྱི་ལེགས་སྐྱེས་ཕུལ་ཡོད།
འདས་ཟིན་པའི་ལོ་ལྔའི་རིང་ལ། ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱི་འགོ་ཁྲིད་འོག དམག་དཔུང་སྟོབས་ལྡན་དང་དམག་དཔུང་དར་རྒྱས་གཏོང་བར་རྣམ་པ་གསར་པ་བཏོད་ཡོད། གནས་བབ་གསར་པའི་འོག་དམག་དོན་འཐབ་ཇུས་ཀྱི་བྱེད་ཕྱོགས་གསར་པ་གཏན་འབེབས་བྱས་ཤིང་། ཀུའུ་ཐེན་དུ་དམག་ཡོངས་ཀྱི་ཆབ་སྲིད་ལས་དོན་གྲོས་ཚོགས་འཚོགས་ནས་ཆབ་སྲིད་ལ་བརྟེན་ནས་དམག་དཔུང་འཛུགས་སྐྱོང་བྱེད་པ་དང་། སྒྱུར་བཅོས་ལ་བརྟེན་ནས་དམག་དཔུང་སྟོབས་ལྡན་དུ་བསྒྱུར་བ། ཚན་རྩལ་ལ་བརྟེན་ནས་དམག་དཔུང་དར་རྒྱས་གཏོང་བ། ཁྲིམས་མཐུན་ལྟར་དམག་དཔུང་བཅོས་སྐྱོང་བྱེད་པ་བཅས་ལ་སྐུལ་འདེད་ཟབ་མོ་བཏང་ཡོད། མི་དམངས་དམག་དཔུང་གི་ཆབ་སྲིད་ཀྱི་སྐྱེ་ཁམས་བསྐྱར་བཟོ་དང་། རྩ་འཛུགས་ཀྱི་རྣམ་པ་བསྐྱར་བཟོ། སྟོབས་ཤུགས་ཀྱི་མ་ལག་བསྐྱར་བཟོ། ཀུན་སྤྱོད་ཀྱི་རྣམ་པ་བསྐྱར་བཟོ་བཅས་མངོན་འགྱུར་བྱུང་ཡོད། མཚོ་ཐོག་གི་ཁེ་དབང་སྲུང་བ་དང་། འཇིགས་རྒོལ་ལྷིང་སྐྱོང་། ཉེན་སེལ་གུད་སྐྱོབ། རྒྱལ་སྤྱིའི་ཞི་སྲུང་། ཡ་ཏིང་མཚོ་ཁུག་གི་མཚོ་འགྲུལ་སྲུང་སྐྱེལ། མི་ཆོས་རིང་ལུགས་ཀྱི་རོགས་སྐྱོབ་སོགས་པའི་ལས་འགན་གལ་ཆེན་རྣམས་ཕན་འབྲས་ཐོན་པར་བསྒྲུབས་ཡོད། ཕྱོགས་གང་ཅིའི་གཞོགས་འདེགས་འོག་དམག་མི་འཕྲི་གྲངས་ཁྲི་30ཡི་ལས་འགན་རྩ་བའི་ཆ་ནས་ཡོངས་སུ་འགྲུབ་ཡོད། དམག་དོན་སྒྲིག་ཆས་དེང་རབས་ཅན་དུ་འགྱུར་བའི་ཆུ་ཚད་མངོན་གསལ་དོད་པོར་མཐོ་རུ་ཕྱིན་པ་དང་། དམག་དམངས་མཉམ་འདྲེས་འཕེལ་རྒྱས་ཟབ་མོ་བྱུང་ཡོད། མི་དམངས་དམག་དཔུང་གི་རྣམ་པ་གསར་པ་གསར་རྐྱང་དུ་གྱུར་ཏེ། ཀྲུང་གོའི་ཁྱད་ཆོས་ལྡན་པའི་དམག་དཔུང་སྟོབས་ལྡན་གྱི་བགྲོད་ལམ་ཐོག་གོམ་སྟབས་བརྟན་པོར་སྤོས་ཡོད།
འདས་ཟིན་པའི་ལོ་ལྔའི་རིང་ལ། ཀང་ཨའོ་ཐའེ་གསུམ་གྱི་ལས་དོན་ལ་འཕེལ་རྒྱས་གསར་པ་བྱུང་ཡོད། “རྒྱལ་ཁབ་གཅིག་ལ་ལམ་ལུགས་གཉིས”ལག་ལེན་རྒྱུན་ཆད་མེད་པར་ཕུན་སུམ་ཚོགས་པོ་དང་འཕེལ་རྒྱས་བྱུང་ཞིང་། ཞང་ཀང་དང་ཨའོ་མོན་དུ་རྩ་ཁྲིམས་དང་གཞི་རྩའི་བཅའ་ཁྲིམས་ཀྱི་དབང་གྲགས་ཇེ་ཆེར་ཕྱིན་པ་དང་། ནང་ས་དང་ཀང་ཨའོ་བར་བརྗེ་རེས་མཉམ་ལས་ལ་སྐུལ་སྤེལ་ཟབ་མོ་བྱས་ཡོད། ཀང་ཀྲུའུ་ཨའོ་གསུམ་གྱི་ཟམ་ཆེན་ཁྱོན་ཡོངས་ནས་ཤར་གཏོང་ཐུབ་པ་བྱུང་ཞིང་། ཞང་ཀང་དང་ཨའོ་མོན་དར་རྒྱས་དང་བརྟན་ལྷིང་རྒྱུན་འཁྱོངས་བྱུང་ཡོད། ཀྲུང་གོ་གཅིག་གི་རྩ་དོན་དང“གོ་གཉིས་ལོའི་ཐུན་མོང་ངོས་འཛིན”མཐའ་འཁྱོངས་དང་། ངོགས་གཉིས་ཀྱི་དཔལ་འབྱོར་དང་རིག་གནས་བརྗེ་རེས་མཉམ་ལས་བྱེད་ཤུགས་ཆེ་རུ་བཏང་ཞིང་། ངོགས་གཉིས་ཀྱི་དབུ་ཁྲིད་པ་ལོ་རྒྱུས་ཀྱི་ངེས་པ་ལྡན་པའི་མཇལ་འཕྲད་བྱུང་ཡོད། “ཐའེ་ཝན་རང་བཙན”གྱི་ཁ་ཕྲལ་སྟོབས་ཤུགས་ལ་ངོ་རྒོལ་དང་བཀག་འགོག་མཐའ་གཅིག་ཏུ་བྱས་ནས། ཐའེ་ཝན་མཚོ་འགག་གི་ཞི་བདེ་དང་བརྟན་ལྷིང་སྲུང་སྐྱོང་ནུས་ལྡན་བྱས་ཡོད།
འདས་ཟིན་པའི་ལོ་ལྔའི་རིང་ལ། ཀྲུང་གོའི་ཁྱད་ཆོས་ལྡན་པའི་རྒྱལ་ཁབ་ཆེན་པོའི་ཕྱི་འབྲེལ་ཕྱོགས་ཡོངས་ནས་སྐུལ་འདེད་བཏང་ཡོད། “རྒྱུད་གཅིག་ལམ་གཅིག”གི་རྒྱལ་སྤྱིའི་མཉམ་ལས་ཀྱི་དབུ་གཙོའི་གླེང་སྟེགས་སྐབས་དང་པོ་དང་། ཨེ་ཤེ་ཡ་དང་ཞི་བདེ་རྒྱ་མཚོའི་དཔལ་འབྱོར་མཉམ་ལས་རྩ་འཛུགས་ཀྱི་དབུ་ཁྲིད་པའི་དངོས་གཞི་མིན་པའི་གྲོས་ཚོགས། རྒྱལ་ཁབ་ཉི་ཤུ་ཚོགས་པའི་དབུ་ཁྲིད་པའི་ཧང་ཀྲོའུ་དབུ་ཚོགས། འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞ་མོན་གྱི་མཇལ་འཕྲད་སོགས་རང་ས་རང་ཡུལ་གྱི་ཕྱི་འབྲེལ་གལ་ཆེན་ལམ་ལྷོང་ངང་གཉེར་ཡོད། ཀྲུའུ་ཞི་ཞི་ཅིན་ཕིང་སོགས་རྒྱལ་ཁབ་ཀྱི་དབུ་ཁྲིད་པ་རྒྱལ་ཁབ་མང་པོར་འཚམས་འདྲིར་ཕེབས་ཤིང་། མཉམ་འབྲེལ་རྒྱལ་ཚོགས་ཀྱི་མུ་འབྲེལ་དབུ་ཚོགས་དང་། གནམ་གཤིས་ཀྱི་འགྱུར་བའི་ཚོགས་ཆེན། འཛམ་གླིང་གི་དཔལ་འབྱོར་གླེང་སྟེགས། ཨེ་ཤེ་ཡ་ཤར་མའི་མཉམ་ལས་དབུ་ཁྲིད་པའི་མུ་འབྲེལ་གྲོས་ཚོགས་སོགས་པའི་བྱེད་སྒོ་གལ་ཆེན་ནང་ཞུགས་ཐོག ཕྱོགས་ཀུན་གྱི་ཕྱི་འབྲེལ་བཀོད་པ་ཟབ་སྤེལ་གནང་ཡོད། མིའི་རིགས་ཀྱི་ལས་དབང་གཅིག་པའི་ཐུན་མོང་ཚོགས་པ་འཛུགས་རྒྱུ་དར་སྤེལ་བཏང་སྟེ། གོ་ལ་ཧྲིལ་པོའི་བཅོས་སྐྱོང་མ་ལག་འཕོ་འགྱུར་གཏོང་བར་ཀྲུང་གོའི་བློ་རིག་སྔར་ལས་མང་པོ་ཕུལ་ཡོད། དཔལ་འབྱོར་ཕྱི་འབྲེལ་དང་མི་ཆོས་བརྗེ་རེས་ཐད་གྲུབ་འབྲས་ཕུལ་དུ་བྱུང་བ་བླངས་ཡོད། རྒྱལ་ཁབ་ཀྱི་བདག་དབང་དང་རྒྱ་མཚོའི་ཁེ་དབང་སྲུང་སྐྱོང་མཐའ་གཅིག་ཏུ་བྱས་ཡོད། ཀྲུང་གོ་ནི་འགན་འཁུར་མཁན་རྒྱལ་ཁབ་ཆེན་པོ་ཞིག་ཡིན་པའི་ཆ་ནས་རྒྱལ་སྤྱི་དང་ས་ཁུལ་གྱི་གླེང་ཆ་ཆེ་བའི་གནད་དོན་ཐག་གཅོད་བྱེད་པའི་ཐད་དགེ་མཚན་ལྡན་པའི་ནུས་པ་གལ་ཆེན་བཏོན་ནས། འཛམ་གླིང་ཞི་བདེ་དང་འཕེལ་རྒྱས་ཡོང་བར་བྱས་རྗེས་གསར་པ་འགངས་ཆེན་བཞག་ཡོད།
འཐུས་མི་རྣམ་པ།
འདས་ཟིན་པའི་ལོ་ལྔར་ཕྱིར་མིག་བལྟས་ན། འགལ་བ་མང་པོ་ཕན་ཚུན་བསྣོལ་མར་ཡོད་ཅིང་། ཉེན་ཁ་དང་འགྲན་སློང་སྣ་ཚོགས་གཅིག་རྗེས་གཉིས་མཐུད་དུ་བྱུང་བ་དང་། རྒྱལ་ཕྱི་རྒྱལ་ནང་གི་གནས་ཚུལ་མང་པོ་ཞིག་ནི་སྒྱུར་བཅོས་སྒོ་འབྱེད་བྱས་ཚུན་དུ་འཕྲད་མྱོང་མེད་པས། རང་རྒྱལ་གྱི་སྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་ནི་ལས་སླ་པོར་བྱུང་བ་གཏན་ནས་མིན་ཞིང་། འདི་ནི་བློ་མཐུན་ཞི་ཅིན་ཕིང་གིས་སྲོང་ཤིང་གནང་བའི་ཏང་ཀྲུང་དབྱང་གིས་དབུ་ཁྲིད་འགྱུར་མེད་སྟོབས་ལྡན་གནང་བའི་འབྲས་བུ་ཡིན་ལ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་དོན་གྱིས་ཚན་རིག་དང་མཐུན་པའི་སྒོ་ནས་སློབ་སྟོན་གནང་བའི་འབྲས་བུ་ཡིན་པ་དང་། ཏང་ཡོངས་དང་དམག་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་མཐུན་སྒྲིལ་འབད་འཐབ་བྱས་པའི་འབྲས་བུ་ཡིན། ངས་རྒྱལ་སྲིད་སྤྱི་ཁྱབ་ཁང་གི་ཚབ་ཞུས་ནས་རྒྱལ་ཡོངས་མི་རིགས་ཁག་གི་མི་དམངས་དང་། དམངས་གཙོའི་ཏང་ཤོག་ཁག མི་དམངས་ཀྱི་ཚོགས་པ་ཁག ལས་རིགས་ཁག་གི་མི་སྣ་བཅས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞང་ཀང་དམིགས་བསལ་སྲིད་འཛིན་ཁུལ་ནས་ཡིན་པའི་སྤུན་ཟླ་དང་། ཨའོ་མོན་དམིགས་བསལ་སྲིད་འཛིན་ཁུལ་ནས་ཡིན་པའི་སྤུན་ཟླ། སྤུན་ཟླ་ཐའེ་ཝན་བ་དང་ཕྱིར་སྡོད་སྤུན་ཟླ་རྣམས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཀྲུང་གོ་དེང་རབས་ཅན་དུ་འཛུགས་སྐྲུན་བྱེད་པར་ཐུགས་ཁུར་དང་རྒྱབ་སྐྱོར་གནང་མཁན་རྒྱལ་ཁབ་ཁག་གི་སྲིད་གཞུང་དང་རྒྱལ་སྤྱིའི་རྩ་འཛུགས། དེ་བཞིན་རྒྱལ་ཁབ་ཁག་གི་གྲོགས་པོ་རྣམས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།
བདེ་དུས་ཉེན་ཁ་བརྗེད་མི་རུང་། དར་དུས་སེམས་ངལ་བརྗེད་མི་རུང་། རང་རྒྱལ་སྔར་བཞིན་སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་དུ་གནས་ཡོད་པ་མ་ཟད་ད་དུང་རྒྱུན་རིང་གནས་ངེས་པ་དང་། རང་རྒྱལ་སྔར་བཞིན་འཛམ་གླིང་གི་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་ཡིན་ཞིང་། འཕེལ་རྒྱས་དོ་མི་མཉམ་ཞིང་གང་ལེགས་མ་བྱུང་བའི་གནད་དོན་འབུར་ཐོན་ཁ་ཤས་སྔར་བཞིན་ཐག་ཆོད་མེད་པ་ང་ཚོས་རིག་པ་དྭངས་གསལ་གྱིས་ངོས་འཛིན་ཐུབ་ཀྱི་ཡོད། དཔལ་འབྱོར་འཕེལ་བར་བྱེད་པའི་གཏིང་གི་སྒུལ་ཤུགས་སྔར་བཞིན་མི་འདང་བ་དང་། གསར་གཏོད་ཀྱི་ནུས་པ་སྔར་བཞིན་ཆེན་པོ་མེད་པ། འཕེལ་རྒྱས་ཀྱི་སྤུས་ཚད་དང་ཕན་འབྲས་ཆེན་པོ་མེད་པ། ཁེ་ལས་ཁ་ཤས་དང་ལྷག་པར་དུ་ཁེ་ལས་འབྲིང་ཆུང་གཉེར་སྐྱོང་དཀའ་ངལ་ཆེ་བ། དམངས་ཁྲོད་ཀྱི་མ་དངུལ་འཇོག་ཚད་ཇེ་ཞན་དུ་སོང་བ། ས་ཁུལ་ཁ་ཤས་ཀྱི་དཔལ་འབྱོར་ཆག་གིས་དོགས་པའི་སེམས་ངལ་ཅུང་ཆེ་བ། དངུལ་རྩ་ལ་སོགས་པའི་ཁྱབ་ཁོངས་ཀྱི་ཉམས་ཉེན་འབྱུང་གཞིར་སྣང་ཆུང་བྱེད་མི་རུང་བར་གྱུར་ཡོད། དབུལ་བྲལ་འགག་སྒྲོལ་གྱི་ལས་འགན་དཀའ་ཚེགས་ཆེ་བ་དང་། ཞིང་ལས་ཀྱི་རྨང་གཞི་སྔར་བཞིན་ཞན་པ། གྲོང་ཁྱེར་དང་གྲོང་གསེབ་ཀྱི་ས་ཁོངས་འཕེལ་རྒྱས་དང་ཡོང་སྒོ་བགོ་བཤའི་ཁྱད་པར་སྔར་བཞིན་ཆེ་ཙམ་དུ་གྱུར་ཡོད། ཐོན་སྐྱེད་བདེ་འཇགས་ཀྱི་བྱུར་ཉེས་ཚབས་ཆེན་དང་ཧ་ཅང་ཆེ་རིགས་ཡང་ཡང་ཐོན་བཞིན་ཡོད། མཁའ་དབུགས་ཀྱི་སྤུས་ཚད་དང་། ཁོར་ཡུག་གི་གཙང་སྦྲ། བཟའ་བཅའ་དང་སྨན་རིགས་གནོད་མེད་དང་སྡོད་ཁང་། སློབ་གསོ། སྨན་བཅོས། ལས་ཞུགས། རྒན་གསོ་སོགས་ཀྱི་ཐད་ལ་མང་ཚོགས་སྔར་བཞིན་ཡིད་མི་ཚིམ་པའི་ཕྱོགས་མི་ཉུང་བ་ཡོད། སྲིད་གཞུང་གི་འགན་ནུས་བསྒྱུར་བ་སྔར་བཞིན་གནད་ལ་འཁེལ་པོ་བྱུང་མེད་པ་དང་། སྲིད་གཞུང་གི་ལས་དོན་ལ་མི་འདང་ས་ཡོད་ཅིང་། སྒྱུར་བཅོས་བྱེད་ཐབས་དང་སྲིད་ཇུས་འགའ་ཤས་དོན་འཁྱོལ་ནུས་ལྡན་བྱུང་མེད་ལ། ལས་བྱེད་པ་འགའ་ཤས་ཀྱི་ཞབས་ཞུའི་འདུ་ཤེས་དང་ཁྲིམས་སྐྱོང་གི་འདུ་ཤེས་ཆེན་པོ་མེད་པ་དང་། ལས་ཀའི་སྤྱོད་ཚུལ་མི་ལེགས་པ། འགན་འཁུར་གྱི་བློ་སྟོབས་ཞན་པ། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཚད་མི་འདྲ་བར་གནས་ཡོད། མང་ཚོགས་དང་ཁེ་ལས་ཀྱིས་ལས་དོན་སྒྲུབ་དཀའ་བ་དང་རིན་དངུལ་གང་བྱུང་དུ་བསྡུ་བར་བསམ་འཆར་མང་ཙམ་ཡོད་པ་རེད། ཁྱབ་ཁོངས་འགའ་ཤས་སུ་ཚུལ་མིན་སྤྱོད་ཡན་དང་རུལ་སུངས་ཀྱི་གནད་དོན་སྔར་བཞིན་མང་པོ་ཐོན་བཞིན་ཡོད། ང་ཚོས་ངེས་པར་དུ་རྒྱལ་ཁབ་དང་མི་དམངས་ལ་འགན་འཁུར་གྱི་བསམ་པ་ཆེན་པོ་བཅངས་ནས། དཀའ་ཚེགས་ལ་མི་སྐྲག་པའི་བློ་སྟོབས་དང་། གཞོམ་ཞིག་མེད་པའི་སྙིང་སྟོབས་ལ་བརྟེན་ནས། ནུས་ཤུགས་ཡོད་རྒུས་ལས་དོན་ལེགས་པོར་བསྒྲུབས་ཏེ། མི་དམངས་སྲིད་གཞུང་གིས་མི་དམངས་ཀྱི་མངག་བཅོལ་གལ་ཆེན་སྟོང་ཟད་དུ་གཏོང་རྒྱུ་མིན།
གཉིས། 2018ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྤྱིའི་བླང་བྱ་དང་སྲིད་ཇུས་ཀྱི་འཕེལ་ཕྱོགས།
ད་ལོ་ནི་ཏང་གི་ཚོགས་ཆེན་བཅུ་དགུ་པའི་དགོངས་དོན་ཕྱོགས་ཡོངས་ནས་ལག་བསྟར་བྱེད་པའི་ལོ་དང་པོ་ཡིན་པ་དང་། སྒྱུར་བཅོས་སྒོ་འབྱེད་བྱས་ནས་ལོ་ངོ་40འཁོར་བའི་ལོ་ཡིན་པ།
【1】
【2】
【3】
【4】
【5】
【6】
