༄༅།།《བདེན་འཚོལ》དུས་དེབ་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་རྩོམ་གལ་ཆེན་བཀོད་པ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་31ཉིན་གློག་འཕྲིན་འབྱོར་གསལ། ཟླ་4ཚེས་1ཉིན་དཔེ་སྐྲུན་བྱས་པའི《བདེན་འཚོལ》དུས་དེབ་འདོན་ཐེངས་བདུན་པའི་ཐོག་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གི་གསུང་རྩོམ་གལ་ཆེན《ཧུའུ་པེ་ཞིང་ཆེན་དུ་ཏོག་གསར་གློ་ཚད་རིམས་ནད་སྔོན་འགོག་ཚོད་འཛིན་ལས་དོན་ལ་རྟོག་ཞིབ་གནང་སྐབས་གནང་བའི་གསུང་བཤད》བཀོད་ཡོད་པ་རེད།
    གསུང་རྩོམ་ནང་ནན་བཤད་གནང་དོན། ཧུའུ་པེ་དང་ཝུའུ་ཧན་ནི་ད་རེས་ཀྱི་རིམས་ནད་སྔོན་འགོག་ཚོད་འཛིན་འཐབ་རྩོད་ཀྱི་གལ་ཆེའི་ནང་གི་འགངས་ཆེ་དང་རྒྱལ་ཁ་ཕུ་ཐག་གཅོད་ས་ཞིག་རེད། དཀའ་སྤྱད་འབད་བརྩོན་བྱས་པ་བརྒྱུད། ཧུའུ་པེ་དང་ཝུའུ་ཧན་གྱི་རིམས་ནད་སྔོན་འགོག་ཚོད་འཛིན་གྱི་དུས་བབ་ལེགས་ཕྱོགས་སུ་འཕེལ་རྒྱས་འགྲོ་བའི་རྣམ་པ་ཐོན་པ་དང་དུས་མཚམས་རང་བཞིན་གྱི་གྲུབ་འབྲས་གལ་ཆེན་ཐོབ་ཡོད། འོན་ཏེ་རིམས་ནད་སྔོན་འགོག་ཚོད་འཛིན་གྱི་ལས་འགན་སྔར་བཞིན་དཀའ་ཚེགས་ཆེན་པོ་དང་ལྗིད་རྫོབ་ཆེན་པོ་ཡོད། དུས་སྐབས་འདི་འདྲ་ཞིག་ཏུ་སླེབས་པ་དེ་ཙམ་གྱིས་རིག་པ་དྭངས་གསལ་དགོས་པ་དང་། དེ་ཙམ་གྱིས་མཇུག་བསྡུ་བའི་དུས་སུའང་འགོ་འཛུགས་སྐབས་བཞིན་གཟབ་ནན་བྱེད་དགོས་པ། དེ་ཙམ་གྱིས་ཡང་འབད་བསྐྱར་འབད་བྱས་ནས་བྱས་རྗེས་འཇོག་མཁས་པོ་དང་གྲུབ་འབྲས་གཏོད་མཁས་པོ་བྱེད་དགོས་ཤིང་། རིམས་ནད་སྔོན་འགོག་ཚོད་འཛིན་དེ་མིག་སྔའི་དོན་ཆེན་ཨང་དང་པོ་དང་ལས་དོན་གལ་ཆེ་ཤོས་ཤིག་ལ་མུ་མཐུད་བརྩིས་ཏེ། སྣང་མེད་དུ་གཏན་ནས་མི་གཏོང་བ་དང་། དམག་འཐབ་ལ་སུན་སྣང་མི་བྱེད་པ། ལྷོད་གཡེང་སྤུ་ཙམ་ཡང་མི་གཏོང་བར་སྔོན་འགོག་ཚོད་འཛིན་གྱི་ལས་དོན་ཁག་ལ་དམ་འཛིན་ནན་པོ་དང་། དམ་འཛིན་ཏན་ཏིག དམ་འཛིན་ཞིབ་ཚགས་བཅས་བྱས་ནས་ཧུའུ་པེ་སྲུང་སྐྱོབ་དམག་འཐབ་དང་ཝུའུ་ཧན་སྲུང་སྐྱོབ་དམག་འཐབ་ལ་རྒྱལ་ཁ་མཐའ་གཅིག་ཏུ་ལེན་དགོས།
    གསུང་རྩོམ་ནང་བསྟན་དོན། ཏོག་གསར་གློ་ཚད་རིམས་ནད་ཐོན་ཚུན་དུ་ཏང་ཀྲུང་དབྱང་གིས་ཚད་མཐོའི་མཐོང་ཆེན་བྱས་ཏེ། ཐོག་མཐའ་བར་གསུམ་དུ་མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་གཟུགས་པོ་བདེ་ཐང་ཨང་དང་པོར་བཞག་པ་དང་། ཧུའུ་པེ་དང་ཝུའུ་ཧན་གྱི་རིམས་ནད་སྔོན་འགོག་ཚོད་འཛིན་གྱི་ལས་དོན་ལ་གཙོ་གནད་རྒྱབ་སྐྱོར་བྱས་པ་དང་། ཁྱབ་ཆེ་ཤོས་དང་། ནན་ཤོས། མཐར་ཕྱིན་ཤོས་བཅས་ཀྱི་སྔོན་འགོག་ཚོད་འཛིན་བྱེད་ཐབས་སྤྱད་ནས་རིམས་ནད་མཆེད་པའི་སྣང་ཚུལ་མཐའ་གཅིག་ཏུ་བཀག་འགོག་བྱས་ཡོད། མི་དམངས་བཅིངས་འགྲོལ་དམག་དང་། ཀྲུང་དབྱང་དང་རྒྱལ་ཁབ་ཀྱི་པུའུ་ཨུད། ཞིང་ཆེན་དང་རང་སྐྱོང་ལྗོངས། གྲོང་ཁྱེར་ཁག་བཅས་ཀྱིས་རོགས་རམ་ཤུགས་ཆེན་བྱས་ཏེ་འཕྲལ་མར་རོགས་སྐྱོར་བྱེད་པར་བསྐྱོད་ནས་རིམས་ནད་སྔོན་འགོག་ཚོད་འཛིན་གྱི་མི་དམངས་ཀྱི་དམག་འཁྲུག་དང་། ཁྱོན་ཡོངས་ཀྱི་དམག་འཐབ། འགོག་རྒོལ་དམག་འཐབ་བཅས་རྒྱག་འགོ་ཚུགས་ཡོད།
    གསུང་རྩོམ་ནང་བསྟན་དོན། སྨན་བཅོས་སྐྱོབ་བཅོས་ཀྱི་ལས་དོན་ཨང་དང་པོར་བཞག་སྟེ་ཚན་རིག་དང་མཐུན་པ་དང་གནད་སྨིན་སྐྱོབ་བཅོས་ཐད་ཤུགས་སྣོན་བརྒྱབ་ནས་དྲག་སྐྱེད་ཡོང་ཚད་མཐོ་རུ་གང་ཐུབ་དང་ན་ཚད་དང་འཆི་ཚད་དམའ་རུ་གང་ཐུབ་གཏོང་དགོས། ལེགས་ཆའི་སྨན་བཅོས་ཀྱི་ཐོན་ཁུངས་དང་ལག་རྩལ་སྟོབས་ཤུགས་གཅིག་སྡུད་བྱས་ནས་ནད་པ་སྐྱོབ་བཅོས་བྱེད་པ་དང་། ཞིབ་དཔྱད་ཚོད་ལྟའི་སྨན་རྫས་དང་། དུག་སྲིན་འགོག་པའི་སྨན། སྔོན་འགོག་སྨན་ཁབ། སྨན་བཅོས་ཇུས་གཞི་སོགས་ཚན་རྩལ་འགག་སྒྲོལ་ལ་མགྱོགས་མྱུར་སྐུལ་འདེད་བཏང་ནས་ཞིབ་འཇུག་གསར་སྤེལ་དང་འདེམས་སྒྲུག་བྱས་ཟིན་པའི་གོ་ཆོད་སྨན་རྫས་མགྱོགས་མྱུར་ཁྱབ་གདལ་དང་བེད་སྤྱོད་བཏང་ནས་སྐྱོབ་བཅོས་ཀྱི་ཆུ་ཚད་མཐོ་རུ་གཏོང་དགོས།
    གསུང་རྩོམ་ནང་བསྟན་དོན། མཉམ་འགོག་མཉམ་འདོམས་ཀྱི་མི་དམངས་ཀྱི་དམག་འཁྲུག་ཡག་པོ་རྒྱག་དགོས། རིམས་ནད་སྔོན་འགོག་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་ལེན་པར་གཙོ་གནད“སྔོན་འགོག”ལ་ཐུག་ཡོད། མི་དམངས་མང་ཚོགས་ལ་དམ་པོར་བརྟེན་པ་དང་། མི་དམངས་མང་ཚོགས་སྐུལ་སློང་གང་ལེགས་བྱེད་པ། མང་ཚོགས་ཀྱི་རང་ངོས་ཞབས་འདེགས་ཞུ་ནུས་དང་རང་ངོས་འགོག་སྲུང་འཇོན་ཐང་ཆེ་རུ་གཏོང་བ་བཅས་བྱེད་དགོས། འགྲོ་འོང་མི་སྣར་དོ་དམ་བྱེད་ཤུགས་ཆེ་རུ་བཏང་སྟེ་རིམས་ནད་རིག་པའི་བརྟག་ཞིབ་ལས་དོན་གཏིང་ཟབ་སྤེལ་དགོས། ཕྱི་ནས་མ་འགོ་བ་དང་ནང་དུ་མ་ཁྱབ་པ་བྱེད་པའི་སྔོན་འགོག་ཚོད་འཛིན་གྱི་ཐབས་ཇུས་རྒྱུན་འཁྱོངས་བྱེད་པ་དང་ཆབས་ཅིག་བདེ་ཐང་དོ་དམ་དང་སྔོན་འགོག་ཚོད་འཛིན་བྱ་ཐབས་དོན་འཁྱོལ་ཡག་པོ་བྱེད་པའི་སྔོན་འགྲོའི་འོག“གཅིག་གཏད་གཅིག་དང་གཅིག་འཐུས་རྣམ་པའི”བྱ་ཐབས་སྤྱད་ནས་གཅིག་སྡུད་གནད་སྨིན་གྱི་སྒོ་ནས་ལས་མི་བདེ་འཇགས་ངང་ལས་གནས་སུ་ལོག་ཐུབ་པ་བྱེད་དགོས།
    གསུང་རྩོམ་ནང་བསྟན་དོན། སྟོབས་ཤུགས་ཞན་པའི་ས་ཁུལ་གྱི་རིམས་ནད་སྔོན་འགོག་ཚོད་འཛིན་ལས་དོན་ལ་ཤུགས་སྣོན་རྒྱག་དགོས། སྨན་བཅོས་ཀྱི་སྟོབས་ཤུགས་ཞན་པའི་གྲོང་ཁྱེར་དང་ཀྲོའུ་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་། ཆུ་ཚད་མཐོ་བའི་རིགས་གཅིག་མཁས་ཅན་ཚོགས་པའི་ནུས་པ་འདོན་པ། སྐོར་སྐྱོད་ནད་བརྟག་སྨན་བཅོས་དང་རྒྱང་འཛིན་ནད་དཔྱད་སོགས་བྱ་ཐབས་ནུས་ལྡན་འཚོལ་ཞིབ། སྨན་བཅོས་ཐོན་ཁུངས་སྤུས་ལེགས་གཞི་རིམ་དུ་ཕྱོགས་པར་སྐུལ་འདེད་གཏོང་བ་བཅས་བྱེད་དགོས། གྲོང་གསེབ་སྨན་བཅོས་འཕྲོད་བསྟེན་གྱི་ཆ་རྐྱེན་ལེགས་སུ་གཏོང་བ་དང་གྲོང་གསེབ་ཀྱི་སྨན་དོན་མི་སྣ་དང་གཞི་རིམ་ལས་བྱེད་པའི་གསོ་སྦྱོང་ལ་ཤུགས་སྣོན་བརྒྱབ་སྟེ་དགོས་ངེས་ཀྱི་འགོག་སྲུང་དངོས་ཟོག་མཁོ་འདོན་བྱེད་དགོས།
    གསུང་རྩོམ་ནང་བསྟན་དོན། མང་ཚོགས་ཀྱི་གཞི་རྩའི་འཚོ་བ་འགན་ལེན་ཡག་པོ་བྱེད་དགོས། དམངས་འཚོ་བརྟན་པོ་བྱུང་ན་མི་སེམས་དང་སྤྱི་ཚོགས་བརྟན་པོ་ཡོང་ཐུབ། མང་ཚོགས་ཀྱི་གཞི་རྩའི་འཚོ་བའི་དགོས་མཁོར་བསམ་གཞིག་གང་ལེགས་བྱས་ཏེ། འབྲུ་རིགས་དང་། བཟའ་སྣུམ། ཤ སྒོ་ང་། འོ་མ་སོགས་འཚོ་བའི་མཁོ་ཆས་ཀྱི་མཁོ་སྤྲོད་འགན་ལེན་བྱེད་དགོས། སེམས་གསོ་གཏོང་བ་དང་སེམས་ཁམས་སློབ་གསོར་ཤུགས་སྣོན་རྒྱག་དགོས། གླེང་ཕྱོགས་ཁྲིད་སྟོན་ལ་ཤུགས་སྣོན་རྒྱག་པ་དང་ཁྲིམས་ལྟར་སྔོན་འགོག་ཚོད་འཛིན་མཐའ་འཁྱོངས་བྱས་ཏེ་རིམས་ནད་སྔོན་འགོག་ཚོད་འཛིན་བྱེད་རིང་ཐོན་སྲིད་པའི་གནད་དོན་སྣ་ཚོགས་ཐག་གཅོད་འོས་འཚམ་བྱས་ཏེ་སྤྱི་ཚོགས་སྤྱི་ཡོངས་ཀྱི་བརྟན་ལྷིང་སྲུང་སྐྱོང་བྱེད་དགོས།
    གསུང་རྩོམ་ནང་བསྟན་དོན། རིམས་ནད་སྔོན་འགོག་ཚོད་འཛིན་དང་འཚམ་པའི་དཔལ་འབྱོར་དང་སྤྱི་ཚོགས་འཁོར་སྐྱོད་སྒྲིག་ལམ་ལྡན་པ་བྱེད་དགོས། ད་རེས་ཀྱི་རིམས་ནད་ལས་དུས་ཐུང་ནང་ཧུའུ་པེའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་འགོག་རྐྱེན་འཕྲད་སྲིད་མོད། འོན་ཀྱང་དཔལ་འབྱོར་ལེགས་ཐོག་ཡར་བརྩོན་དང་ཡུན་རིང་ལེགས་པའི་ཕྱོགས་སུ་འཕེལ་རྒྱས་འགྲོ་བའི་གཞི་རྩའི་རྣམ་པར་འགྱུར་ལྡོག་འགྲོ་མི་སྲིད། སྔོན་འགོག་ཚོད་འཛིན་ལ་ཤུགས་སྣོན་རྒྱག་པའི་སྔོན་འགྲོའི་འོག་ཧེ་བག་ཅན་གྱི་བྱེད་ཐབས་སྤྱད་དེ། ཁུལ་དབྱེ་རིམ་དབྱེ་དང་རིགས་དབྱེ་དུས་དབྱེའི་ཆ་རྐྱེན་འཛོམས་པའི་དུས་ཚོད་འོས་འཚམ་ནང་ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་བྱེད་དགོས།
    གསུང་རྩོམ་ནང་བསྟན་དོན། བཅོས་སྐྱོང་མ་ལག་དང་བཅོས་སྐྱོང་ནུས་པའི་ཞན་ཆ་སེལ་དགོས། ད་རེས་ཀྱི་ཏོག་གསར་གློ་ཚད་རིམས་ནད་སྔོན་འགོག་ཚོད་འཛིན་ནི་བཅོས་སྐྱོང་མ་ལག་དང་བཅོས་སྐྱོང་ནུས་པར་ཚོད་བགམ་ཆེན་པོ་བྱས་པ་ཞིག་རེད། དེ་ལས་ཉམས་མྱོང་གསོག་ཐུབ་ལ་བསླབ་བྱའང་འཐོབ་སྲིད། མིག་རྒྱང་རིང་པོས་ཉམས་མྱོང་དང་བསླབ་བྱར་ཕྱོགས་སྡོམ་བྱས་ཏེ། བཅོས་སྐྱོང་མ་ལག་གི་ཞན་ཆ་དང་ཉམས་ཞན་གྱི་ཆ་གང་མགྱོགས་བསལ་ནས་མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་འགན་སྲུང་ཆེད་ལམ་ལུགས་ཀྱི་འགོག་སྲུང་འཛིང་རགས་བརྟན་པོ་སྐྲུན་དགོས། སྤྱི་པའི་འཕྲོད་བསྟེན་འཕྲལ་སྡོམ་དོ་དམ་མ་ལག་འཐུས་སྒོ་ཚང་དུ་གཏོང་རྒྱུར་ཤུགས་སྣོན་བརྒྱབ་ནས་ཐོལ་བྱུང་གི་སྤྱི་པའི་འཕྲོད་བསྟེན་དོན་རྐྱེན་ཚབས་ཆེན་ལ་ཁ་གཏད་གཅོག་པའི་ནུས་པ་དང་ཆུ་ཚད་མཐོ་རུ་གཏོང་དགོས། གྲོང་ཁྱེར་དང་གྲོང་གསེབ་ཀྱི་གཞི་རིམ་བཅོས་སྐྱོང་མ་ལག་འཐུས་སྒོ་ཚང་དུ་ནུས་ལྡན་བཏང་སྟེ། “དུས་འཁོར་ཧྲིལ་པོའི་དོ་དམ”གྱི་འདུ་ཤེས་བཙུགས་ནས་ཤིན་ཏུ་ཆེ་བའི་གྲོང་ཁྱེར་གྱི་དེང་རབས་ཅན་གྱི་བཅོས་སྐྱོང་ལམ་བུ་གསར་པ་འཚོལ་ཞིབ་ཧུར་ཐག་བྱེད་དགོས།
    གསུང་རྩོམ་ནང་ནན་བཤད་གནང་དོན། རང་རེའི་ཏང་ནི་ནང་རྩོད་ཕྱི་འཁྲུག་གི་ཁྲོད་དུ་དབུ་བརྙེས་པ་དང་། དཀའ་ཚེགས་ཆེ་ལ་ཀྱག་ཀྱོག་གི་ལམ་བུའི་ཁྲོད་དུ་འཚར་ལོངས་བྱུང་བ། འགག་སྒྲོལ་དཀའ་སེལ་ཁྲོད་སྟོབས་ཆེར་སོང་བ་ཞིག་རེད། འཐབ་རྩོད་བྱེད་ཕོད་པ་དང་རྣམ་པར་རྒྱལ་ཕོད་པ་ནི་ཀྲུང་གོ་གུང་ཁྲན་ཏང་མིའི་མངོན་གསལ་དོད་པའི་ཆབ་སྲིད་ཀྱི་སྤྱོད་བཟང་ཞིག་ཡིན་ལ། ང་ཚོའི་ཆབ་སྲིད་ཀྱི་ལེགས་ཆ་ཞིག་ཀྱང་རེད།