༄༅།།ཞི་ཅིན་ཕིང་གིས“དཔའ་མཛངས་རྟུལ་ཕོད་ཀྱི་ལན་ཤོག་དྲུག་པའི”དཔོན་དམག་ཡོངས་ལ་
འཕྲིན་ལན་སྤྲིངས་གནང་བ།

     ཁོང་ཚོར“དཔའ་མཛངས་རྟུལ་ཕོད་ཀྱི་སྙིང་སྟོབས”དར་སྤེལ་ཤུགས་ཆེན་བཏང་ནས་ལན་ཤོག་སྔར་བས་སྲ་ཞིང་བརྟན་པ་འཛུགས་སྐྲུན་བྱེད་དགོས་པའི་ལྕག་སྐུལ་གནང་བ།
     ཤིན་ཧྭ་གསར་འགྱུར་ཁང་པེ་ཅིང་ནས་ཟླ་1ཚེས་19ཉིན་གློག་འཕྲིན་འབྱོར་གསལ། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཟླ་1ཚེས་18ཉིན་འབུམ་ཤོག་ཆེ་མོ་74པའི་ལུའེ་ཤོག་ཅིག་གི“དཔའ་མཛངས་རྟུལ་ཕོད་ཀྱི་ལན་ཤོག་དྲུག་པའི”དཔོན་དམག་ཡོངས་ལ་འཕྲིན་ལན་སྤྲིངས་གནང་ནས། ཁོང་ཚོར་དམག་དཔུང་སྟོབས་ཆེར་གཏོང་བའི་དམིགས་ཚད་བློ་ལ་བརྟན་པོར་ངེས་པ་དང་། གསར་བརྗེའི་ས་བོན་རྒྱུན་འཛིན་བྱེད་པ། རྣམ་པར་རྒྱལ་བའི་འཇོན་ཐང་སྦྱོང་བ་བཅས་བྱས་ཏེ། “དཔའ་མཛངས་རྟུལ་ཕོད་ཀྱི་སྙིང་སྟོབས”དར་སྤེལ་ཤུགས་ཆེན་གཏོང་བ་དང་། ལན་ཤོག་སྔར་བས་སྲ་ཞིང་བརྟན་པ་འཛུགས་སྐྲུན་བྱེད་དགོས་པའི་ལྕག་སྐུལ་གནང་བ་དང་སྦྲགས། དཔོན་དམག་དང་ཁོང་ཚོའི་ནང་མིར་དཔྱིད་གསར་གྱི་སྨོན་འདུན་ཡང་ཞུས་གནང་བ་རེད། འཕྲིན་ལན་ཆ་ཚང་གཤམ་གསལ་ཏེ།
     “དཔའ་མཛངས་རྟུལ་ཕོད་ཀྱི་ལན་ཤོག་དྲུག་པའི”དཔོན་དམག་ཡོངས་ལ།
     ཁམས་བཟང་། ཁྱེད་ཚོའི་འཕྲིན་ཡིག་ལག་འབྱོར་བྱུང་། 2004ལོར་ངས་ཆེད་མངགས་ལན་ཤོག་ཏུ་ཁྱེད་ཚོར་བལྟ་བར་ཡོང་བ་ཡིན། ཁྱེད་ཚོས་སྒར་ས་སྤོས་རྗེས་གཟི་བརྗིད་ཀྱི་སྲོལ་རྒྱུན་དར་སྤེལ་བཏང་བར། གྲུབ་འབྲས་དང་ཡར་རྒྱས་གསར་པ་ཐོབ་པ་ཤེས་རྟོགས་བྱུང་བས་ང་རང་དགའ་སྤྲོ་ཤིན་ཏུ་ཆེ།
     གཞི་རིམ་ནི་དཔུང་སྡེའི་ལས་དོན་ཡོངས་དང་དམག་འཐབ་ནུས་པའི་རྨང་གཞི་རེད། ཁྱེད་ཚོས་དམག་དཔུང་སྟོབས་ཆེར་གཏོང་བའི་དམིགས་ཚད་བློ་ལ་བརྟན་པོར་ངེས་པ་དང་། གསར་བརྗེའི་ས་བོན་རྒྱུན་འཛིན་བྱེད་པ། རྣམ་པར་རྒྱལ་བའི་འཇོན་ཐང་སྦྱོང་བ་བཅས་བྱས་ཏེ། “དཔའ་མཛངས་རྟུལ་ཕོད་ཀྱི་སྙིང་སྟོབས”དར་སྤེལ་ཤུགས་ཆེན་གཏོང་བ་དང་། ལན་ཤོག་སྔར་བས་སྲ་ཞིང་བརྟན་པ་འཛུགས་སྐྲུན་བྱ་རྒྱུའི་རེ་བ་བྱེད་བཞིན་ཡོད།
      དཔྱིད་གསར་དུས་ཆེན་འཆར་ཉེར་ཡོད་པའི་མཚམས་འདིར་ངས་ཁྱེད་ཚོ་དང་ཁྱེད་ཚོའི་ནང་མིར་ལྷག་བསམ་རྣམ་དག་གི་འཚམས་འདྲི་དང་སྨོན་འདུན་བཟང་པོ་ཞུ་རྒྱུ་ཡིན།
                                                                                                                                                                          ཞི་ཅིན་ཕིང་།
                                                                                                                                                          2020ལོའི་ཟླ་1ཚེས་18ཉིན།
     “དཔའ་མཛངས་རྟུལ་ཕོད་ཀྱི་ལན་ཤོག་དྲུག་པ”ནི་གཟི་བརྗིད་ཀྱི་སྲོལ་རྒྱུན་ལྡན་པའི་དཔའ་བོའི་ལན་ཤོག་ཅིག་རེད། 1964ལོར་རྒྱལ་སྲུང་པུས་ལན་ཤོག་དེར“དཔའ་མཛངས་རྟུལ་ཕོད་ཀྱི་ལན་ཤོག་དྲུག་པའི”གཟི་བརྗིད་མཚན་སྙན་སྤྲད་པ་རེད། ཞི་ཅིན་ཕིང་གིས་གཞི་རིམ་དང་དཔོན་དམག་ལ་བརྩེ་བ་བཅངས་གནང་ནས“དཔའ་མཛངས་རྟུལ་ཕོད་ཀྱི་ལན་ཤོག་དྲུག་པར”ཐོག་མཐའ་བར་གསུམ་དུ་ཐུགས་འཁུར་ཆེན་པོ་གནང་གི་ཡོད། 2004ལོར་ཞི་ཅིན་ཕིང་ཆེད་མངགས་ལན་ཤོག་ལ་མཚན་སྙན་སྤྲད་ནས་ལོ་ངོ་40འཁོར་བར་དྲན་གསོ་ཞུ་བའི་ཚོགས་ཆེན་ལ་ཕེབས་ཏེ། བྱམས་བརྩེའི་ངང་ལན་ཤོག་ལ་གཟིགས་པ་རེད། 2014ལོར་ཀུའུ་ཐན་དམག་ཡོངས་ཀྱི་ཆབ་སྲིད་ལས་དོན་ཚོགས་འདུའི་ཐོག ཞི་ཅིན་ཕིང་གིས་སྐབས་དེའི་ལན་ཤོག་གི་སློབ་སྟོན་པར་མཇལ་འཕྲད་གནང་བ་དང་། ལན་ཤོག་ཡོངས་ཀྱི་དཔོན་དམག་ལ་བྱམས་བརྩེའི་འཚམས་འདྲི་གནང་བ་རེད། ཉེ་ཆར། “དཔའ་མཛངས་རྟུལ་ཕོད་ཀྱི་ལན་ཤོག་དྲུག་པའི”དཔོན་དམག་ཡོངས་ཀྱིས་བརྩེ་བ་ཟབ་མོས་ཀྲུའུ་ཞི་ཞི་ཅིན་ཕིང་ལ་འཕྲིན་ཡིག་ཕུལ་ནས། སྒར་ས་སྤོས་རྗེས་ཀྱི་ཁོང་ཚོའི་ལས་སློབ་གང་ཅིའི་ཐད་ཀྱི་གནས་ཚུལ་སྙན་སེང་ཞུས་ཏེ། ཀྲུའུ་ཞི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་ངེས་པ་དང་། གཟི་བརྗིད་ཀྱི་སྲོལ་རྒྱུན་དར་སྤེལ་གཏོང་བ། དམག་དཔུང་སྟོབས་ཆེར་གཏོང་བ་དང་རྣམ་པར་རྒྱལ་བ་བཅས་ཀྱི་ཆོད་སེམས་བརྟན་པོ་མཚོན་པར་བྱས་པ་རེད།