མི་དམངས་དྲ་བའི་འཕྲིན། ཟླ་9ཚེས་6ཉིན་གྱི་ཉིན་གུང་ཡུས་ཀྲེང་ཧྲེང་གིས་ཀྲུང་དབྱང་སྐུ་ཚབ་ཚོགས་པའི་སྣེ་ཁྲིད་དེ་ཆེད་སྤྱོད་གནམ་གྲུར་བཞུགས་ཏེ་ལྷ་སའི་གོང་དཀར་གནམ་གྲུ་ཐང་དུ་འབྱོར་ཞིང་། བོད་ལྗོངས་ཀྱི་ཏང་སྲིད་དམག་གསུམ་གི་འགོ་ཁྲིད་གནམ་གྲུ་ཐང་དུ་དགའ་བསུ་ཞུ་བར་ཕེབས་པ་དང་། གནམ་གྲུ་ཐང་དུ་མི་རིགས་ཁག་གི་མང་ཚོགས་ཀྱིས་གླུ་ལེན་བྲོ་འཁྲབ་ཀྱིས་དགའ་བསུ་ཞུས་པ་རེད། ཐེངས་འདིའི་ཀྲུང་དབྱང་སྐུ་ཚབ་ཚོགས་པས་ཕྱག་རྟགས་9བསྣམས་ཡོད་པ་དང་། དེའི་ཁྲོད་ཕྱག་རྟགས་གཅིག་ནི་རིན་ཐང་བྲལ་བའི་ནོར་བུ་རེད།
ཕྱག་རྟགས་དང་པོ། རྟེན་འབྲེལ་ཞུ་བྱང་། རྟེན་འབྲེལ་ཞུ་བྱང་གི་སྟེང་དུ་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་ཕྱག་བྲིས་གནང་བའི“མི་རིགས་མཐུན་སྒྲིལ་བྱེད་ཤུགས་ཆེ་རུ་བཏང་སྟེ་མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་དགོས”ཞེས་པ་དཔར་བཏབ་ཡོད་ཅིང་། བོད་རང་སྐྱོང་ལྗོངས་རིམ་པ་ཁག་གི་ཏང་ཨུ་དང་སྲིད་གཞུང་དང་དེ་བཞིན་འབྲེལ་ཡོད་ལས་ཁུངས་ལ་གནང་རྒྱུ།
ཕྱག་རྟགས་གཉིས་པ། བཀྲ་ཤིས་གོས་དར། བཀྲ་ཤིས་གོས་དར་སྟེང་དུ་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་ཕྱག་བྲིསགནང་བའི་“མི་རིགས་མཐུན་སྒྲིལ་བྱེད་ཤུགས་ཆེ་རུ་བཏང་སྟེ་མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་དགོས་”ཞེས་པ་དཔར་བཏབ་ཡོད་ཅིང་། བོད་རང་སྐྱོང་ལྗོངས་རིམ་པ་ཁག་གི་ཏང་ཨུ་དང་སྲིད་གཞུང་དང་དེ་བཞིན་འབྲེལ་ཡོད་ལས་ཁུངས་ལ་གནང་རྒྱུ།
ཕྱག་རྟགས་གསུམ་པ། གཙོ་འཛིན་གྱི་སྐུ་པར། མའོ་ཙེ་ཏུང་དང་། ཏེང་ཞའོ་ཕིན། ཅང་ཙེ་རྨིན། ཧུའུ་ཅིན་ཐའོ། ཞིས་ཅིན་ཕིང་བཅས་གཙོ་འཛིན་ལྔའི་ལྷན་བཞུགས་སྐུ་པར་བྲིས་མ། བོད་ལྗོངས་ཀྱི་ལས་ཁུངས་ཁག་དང་དགོན་པ་ཁག་དང་། མི་རིགས་ཁག་གི་ལས་བྱེད་པ་དང་མང་ཚོགས་ལ་གནང་རྒྱུ།
ཕྱག་རྟགས་བཞི་པ། འཁྱེར་བདེ་བའི་ཉི་ནུས་བརྙན་འཕྲིན། གློག་མེད་པའི་ས་ཁུལ་གྱི་ཞིང་འབྲོག་མང་ཚོགས་ལ་གནང་རྒྱུ།
ཕྱག་རྟགས་ལྔ་པ། གློག་སྒུལ་ཇ་སྲུབ་འཕྲུལ་ཆས། རྒྱ་ཆེའི་ཞིང་འབྲོག་མང་ཚོགས་ལ་གནང་རྒྱུ།
ཕྱག་རྟགས་དྲུག་པ། གསོལ་ཇའི་ཞལ་དཀར། རྒྱ་ཆེའི་ཞིང་འབྲོག་མང་ཚོགས་ལ་གནང་རྒྱུ།
ཕྱག་རྟགས་བདུན་པ། དྲན་རྟེན་བཏུང་སྣོད། ལས་བྱེད་པ་དང་ལས་བཟོ་པ་དང་། ལས་ཁྱུར་ངལ་གསོའི་མི་སྣ། བོད་སྡོད་དཔོན་དམག་བཅས་ལ་གནང་རྒྱུ།
ཕྱག་རྟགས་བརྒྱད་པ། ཚོན་ལྡན་གཡུ་རྩིའི་བདེ་འཁོད་བུམ་པ། ཞི་མཐུན་དཔེ་བཟང་དགོན་པར་གནང་རྒྱུ།
ཕྱག་རྟགས་དགུ་པ། རིན་ཐང་བྲལ་བའི་ནོར་བུ། འདི་ནི་ཕྱག་རྟགས་ཡོངས་ནང་གལ་ཆེ་ཤོས་དང་རྩ་ཆེ་ཤོས་ཀྱི་ཕྱག་རྟགས་ཤིག་ཡིན་པ་སྟེ། ཏང་ཀྲུང་དབྱང་གི་བྱམས་བརྩེ་ལྡན་པའི་ཐུགས་ཁུར་དང་། རྒྱལ་ཡོངས་མི་རིགས་ཁག་གི་མི་དམངས་ཀྱི་བརྩེ་དུང་ཟབ་མོ་ཡིན་ཞིང་། འདི་ནི་བོད་ལྗོངས་ཀྱི་ལས་ཁུངས་དང་། དགོན་སྡེ། གྲོང་ཚོ། འབྲོག་ར། ཚོང་ཁང་། བོད་ལྗོངས་མི་དམངས་བཅས་ཡོངས་རྫོགས་ལ་གནང་རྒྱུ་རེད།
ཀྲུང་དབྱང་སྐུ་ཚབ་ཚོགས་པའི་ཁོངས་མི་ནི་ཀྲུང་དབྱང་རྒྱལ་ཁབ་ཀྱི་ལས་ཁུངས་38དང་བོད་སྐྱོར་ཞིང་ཆེན་དང་གྲོང་ཁྱེར་17ལས་གྲུབ་པ་ཡིན་ཞིང་། ཁྱོན་བསྡོམས་ཁོངས་མི་65ཡོད་པ་དང་། དེའི་ཁྲོད་ཚོགས་གཙོ་གཞོན་པའི་གྲས་སུ་ལིའུ་ཡན་ཏུང་དང་། སུན་ཁྲོན་ལན། ཏུའུ་ཆིན་ལིན། བྱམས་པ་ཕུན་ཚོགས། འཕགས་པ་ལྷ་དགེ་ལེགས་རྣམ་རྒྱལ། རག་སྡིས། ཀྲང་དབྱང་བཅས་ཡོད་པ་རེད།
|
