༄༅།།ཞིས་ཅིན་ཕིང་གིས་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱི་ཨབ་ཀྲ་པེའི་རྒྱལ་རྒྱུད་
འཛིན་མཁན་མུའུ་ཧན་མོ་ཏེ་དང་མཇལ་འཛོམས་གནང་བ།

         མི་དམངས་དྲ་བའི་འཕྲིན། ཟླ་12ཚེས་14ཉིན་རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གིས་མི་དམངས་ཚོགས་ཁང་ཆེ་མོར་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱི་ཨབ་ཀྲ་པེའི་རྒྱལ་རྒྱུད་འཛིན་མཁན་མུའུ་ཧན་མོ་ཏེ་དང་མཇལ་འཛོམས་གནང་བ་རེད།
         ཞིས་ཅིན་ཕིང་གིས་དེང་སྐབས་ཀྲུང་ཨའི་འབྲེལ་བ་ཟམ་མི་ཆད་པར་ཡག་ཏུ་ཕྱིན་ནས་ཁྱོན་ཡོངས་དང་། དོན་གཉེར། ནུས་ཆེ། མགྱོགས་མྱུར་བཅས་ངང་འཕེལ་རྒྱས་གཏོང་བའི་རྣམ་པ་གསར་པ་ཞིག་བཏོད་ཡོད། ཀྲུང་གོ་ཕྱོགས་ཀྱིས་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་དེ་མཚོ་ཁུག་ས་ཁུལ་དུ་ཡོད་པའི་ཀྲུང་གོའི་གྲོགས་པོ་ཡག་པོ་དང་རོགས་ཟླ་ཡག་པོར་བརྩིས་ཏེ་ཨབ་ཀྲ་པེ་ཕྱོགས་དང་འཐབ་ཇུས་རོགས་ཟླའི་འབྲེལ་བ་ཡག་ཏུ་བཏང་ནས་ཀྲུང་ཨའི་མཛའ་མཐུན་གཉིས་ཕན་དང་མཉམ་ལས་ཀྱི་རྣམ་པ་གསར་པ་ཞིག་གཏོད་འདོད་ཡོད་ཅེས་གསུངས་པ་རེད།
         མུའུ་ཧན་མོ་ཏེས་ཀྲུང་གོ་ནི་རླབས་ཆེན་གྱི་རྒྱལ་ཁབ་ཅིག་ཡིན་པ་དང་། རྒྱལ་སྤྱིའི་ཐོག་གལ་འགངས་ཆེ་བའི་ནུས་པ་འདོན་ཀྱི་ཡོད། ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱིས་ཀྲུང་གོ་དང་འཐབ་ཇུས་རོགས་ཟླའི་འབྲེལ་བ་གཏིང་ཟབ་ཏུ་གཏོང་བར་འབད་པ་བྱེད་པ་དང་ཀྲུང་གོར་མ་འཇོག་བྱེད་ཤུགས་ཆེ་རུ་གཏོང་རྒྱུ་ཡིན་ཞེས་གསུངས་པ་རེད།