མི་དམངས་དྲ་བའི་འཕྲིན། ཉེ་ཆར་ཀྲུང་གུང་ཀྲུང་དབྱང་གཞུང་དོན་ཐིང་གིས་《འགོ་ཁྲིད་ལས་བྱེད་པ་གོ་གནས་འཕར་ཆག་ཡོད་པར་སྐུལ་འདེད་གཏོང་རྒྱུའི་སྐོར་གྱི་གཏན་འབེབས་འགའ་ཞིག་(ཚོད་ལྟའི་ལག་བསྟར)》(གཤམ་དུ་བསྡུས་མིང་དུ་《གཏན་འབེབས་》ཞེས་བརྗོད་རྒྱུ)པར་འགྲེམས་བྱས་པ་དང་འབྲེལ་ས་གནས་ཁག་དང་སྡེ་ཚན་ཁག་གིས་གཏན་འབེབས་བཞིན་ལག་ལེན་ནན་པོ་བསྟར་དགོས་པའི་བླང་བྱ་བཏོན་ཡོད་པ་རེད།
བརྡ་ཐོའི་ནང་《གཏན་འབེབས་》ཀྱིས་ཕྱོགས་ཡོངས་ནས་ཏང་ནན་པོ་སྐྱོང་བ་དང་ལས་བྱེད་པར་དོ་དམ་ནན་པོ་བྱེད་པའི་བླང་བྱ་བཞིན་ལས་བྱེད་པའི་གོ་གནས་འཕར་ཆག་གི་གནད་དོན་ཐག་གཅོད་བྱེད་རྒྱུའི་ཐད་གཏན་འབེབས་ཞིབ་ཕྲ་བྱས་ཏེ་ལས་ཀའི་གོ་རིམ་ཚད་ལྡན་དུ་གཏོང་བ་དང་ལས་ཀའི་འགན་འཁྲིའི་ལམ་ལུགས་བཙུགས་པ་དེ་ནི་དུས་སྐབས་གསར་པའི་ལས་བྱེད་པའི་ལས་དོན་གྱི་གལ་ཆེའི་བརྩི་སྲུང་ཞུ་ཡུལ་ཞིག་རེད། 《གཏན་འབེབས་》ཁྱབ་བསྒྲགས་ལག་བསྟར་བྱེད་པ་དེ་ཏང་གི་ཚོགས་ཆེན་བཅོ་བརྒྱད་པ་དང་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་བཞི་པའི་དགོངས་དོན་ལག་བསྟར་དོན་འཁྱོལ་བྱེད་པ་དང་། སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་གལ་ཆེའི་གསུང་བཤད་རབ་དང་རིམ་པའི་དགོངས་དོན་ལག་བསྟར་དོན་འཁྱོལ་བྱེད་པ། ལས་བྱེད་པའི་དཔུང་ཁག་འཛུགས་སྐྱོང་ལ་དོ་དམ་ནན་པོ་བྱེད་པའི་མ་ལག་འཐུས་ཚང་དུ་གཏོང་བ། དཔོན་པོ་བྱེད་སྐབས་གཞུང་དྲང་མེད་པ་དང་། དཔོན་པོ་བྱེད་སྐབས་སྒྲུབ་དགོས་པའི་ལས་མི་སྒྲུབ་པ། དཔོན་པོ་བྱེད་སྐབས་དབང་ཆ་གང་བྱུང་དུ་སྤྱོད་པ་སོགས་ཀྱི་གནད་དོན་ཐག་གཅོད་ནུས་ལྡན་བྱེད་པ། སྤྱོད་ཡོན་ལྡན་ལ་འཇོན་ཐང་ཅན་གོ་གནས་སྤོར་བ་དང་སྤྱོད་ངན་ནུས་མེད་ཕྱིར་འབུད་བྱེད་པའི་སྟོན་ཕྱོགས་དང་སྲིད་འཛིན་ཁོར་ཡུག་ལ་སྐུལ་འདེད་གཏོང་བ། བྱང་ཚད་མཐོ་བའི་ལས་བྱེད་དཔུང་ཁག་འཛུགས་སྐྱོང་བྱེད་པ་བཅས་ཀྱི་ངོས་ནས་བརྗོད་ཚེ་ཧ་ཅང་གལ་འགངས་ཆེ་བའི་དོན་སྙིང་ལྡན་ཡོད་ཅེས་བསྟན་ཡོད་པ་རེད།
བརྡ་ཐོའི་ནང་རིམ་ཁག་ཏང་ཨུད་(ཏང་ཙུའུ)ཀྱིས་འགོ་ཁྲིད་ལས་བྱེད་པ་གོ་གནས་འཕར་ཆག་ཡོད་པར་སྐུལ་འདེད་གཏོང་རྒྱུ་དེ་ཕྱོགས་ཡོངས་ནས་ཏང་ནན་པོ་སྐྱོང་བ་དང་ལས་བྱེད་པར་དོ་དམ་ནན་པོ་བྱེད་པའི་གལ་ཆེའི་ནང་དོན་ནང་བཅུག་ནས་རྩ་དོན་མཐའ་འཁྱོངས་དང་འགན་འཁྲི་འཁུར་ཕོད་པ་བྱས་ཏེ་དོ་དམ་ནན་པོ་དངོས་འབྲེལ་ཐུབ་པ་དང་། དོ་དམ་ནན་པོ་བྱེད་ཕོད་པ། དོ་དམ་ནན་པོ་ཡུན་རིང་ཐུབ་པ་བཅས་བྱེད་དགོས། སྲིད་ཇུས་ཀྱི་ཚད་གཞི་སྟངས་འཛིན་ཡང་དག་ཐུབ་པ་བྱས་ནས་ལས་སྒྲུབ་ལས་གཏོད་དང་སྒྱུར་བཅོས་གསར་གཏོད་ཀྱི་ལས་བྱེད་པའི་ཧུར་བརྩོན་རང་བཞིན་སྲུང་རྒྱུར་དོ་སྣང་བྱེད་དགོས། ལྟ་སྐུལ་ཞིབ་བཤེར་ལ་ཤུགས་སྣོན་གྱིས་《གཏན་འབེབས་》དོན་འཁྱོལ་བྱ་ཤུགས་མི་འདང་བའི་རིགས་ལ་འགན་འཁྲི་བདའ་འདེད་ནན་པོ་གཏོང་དགོས་པའི་བླང་བྱ་བཏོན་ཡོད་པ་རེད།
